Мектеп тауарын арзанға сататын автодүкендер ұйымдастыру керек – Әлихан Смайылов

«Жаңа оқу жылы қарсаңында шалғай ауылдарда мектеп тауарын арзанға сататын автодүкендер ұйымдастыру керек». Үкімет басшысы Әлихан Смайылов жауаптыларға осындай тапсырма берді, деп хабарлайды Almaty.tv.

Ол сондай-ақ өңір әкімдіктеріне көмекке мұқтаж балаларды мемлекеттік қолдаумен толық қамту қажеттігін айтты. Премьер-министрдің сөзінше, биыл аз қамтылған отбасына 37 мың теңге көлемінде ақшалай қаражат беріледі. Ол - қажетті киім-кешек пен кеңсе тауарларын сатып алу мақсатында болмақ. Ал мұндай көмек 470 мыңнан астам балаға көрсетіледі.

«Сауда министрлігі «Атамекен» палатасымен және әкімдіктермен бірлесіп, мектепке қажетті керек-жарақтар бағаларының тұрақты болуын қамтамасыз етсін. Индустрия және инфрақұрылымдық даму министрлігіне «Атамекен» палатасымен бірлесіп, мектеп формасының құнына қатысты мәселені пысықтасын. «Бәсекелестікті қорғау және дамыту агенттігі осы мәселелерді бақылауға алсын», – деді ҚР Премьер-Министрі Әлихан Смайылов.