«Мектепке жол» акциясы аясында 36 оқушыға киімдер мен құрал-жабдықтар тапсырылды

Әлеуметтік аз қамтылған және көпбалалы отбасылардың балаларына көмек көрсетілді. «Мектепке жол» акциясы аясында Әуезов ауданының 36 оқушысы сөмке, форма және кітап-құралға қарық болды, деп хабарлайды Almaty.tv тілшісі.

Мұндай шара жомарт жандардың арқасында жүзеге асуда. Оқу жылы басталғанша ауданда 1000 балаға мектепке қажетті құралдар үлестіру көзделіп отыр. Ата-аналар ұйымдастырушылар мен алтын жүректі азаматтарға ризашылықтарын білдірді. 

«Әрине көңілден шығады, әр берілген затқа шүкіршілік етеміз. Рахмет бәріне. Жылда негізі әр балаға 200 мың теңге көлемінде шығады. 4 балаға арналған мектеп формасы, спорттық киімдері, тіпті аяқ киіміне дейін бәрі бар»,  – дейді Айгүл НОБАЕВА.

«Бұл шара бүгін бірінші рет ұйымдастырылып жатыр. Бұл акция барлық ауданды қамтиды. Біз аз қамтылған отбасылардың барлық балаларына көмек беруге тырысамыз», – деді «NUR OTAN» депутаттық фракциясының мүшесі Ерболат ҚАСЫМОВ.