Маңғыстау облысында тұрғындар малға қағаз беруге мәжбүр

Әлеуметтік желіде қағаз жеп жатқан түйелердің видеосы тарап кетті. Ал жылқылар күл-қоқыстың маңайынан шықпайды, деп хабарлайды Almaty.tv тілшісі Sputnik Қазақстанға сілтеме жасап.

«Міне, Маңғыстаудың түйелері қағаз жеп жүр. Жылқылар ғана емес, түйелер де жейді. Қағазбен күн көріп жүр. Оларды айдап жібереміз, бірақ қайтып келеді. Қағазды осылай қораның қасына салып қоямыз. Ал мынау арық-арық тайлар. Шөп жоқ. Мынаның бәрі – қағаз. Осылай майдалап-майдалап қағаз береміз», – дейді видео авторы.

Айта кетейік, 10 маусым күні онлайн режимде өткен халыққа есеп беру кездесуінде облыс басшысы Серікбай Тұрымов қуаңшылыққа байланысты мал басын сақтап қалу мақсатында қолға алынған шаралар туралы баяндаған болатын. Оның айтуынша, мал азығы қорын молайту үшін жергілікті бюджеттен 200 миллион теңгеден астам қаражат бөлінді.

«Биыл қыста қардың, көктемде жауын-шашынның түспеуі мал өсіріп отырған шаруаларға қиындық тудырып отыр. Осыған орай арнайы жұмыс тобы құрылды. Өлкенің жеке шаруашылықтарын мал азығымен қамтамасыз ету үшін жақын орналасқан Ақтөбе облысымен келіссөздер жүргізілді. Оның ішінде мал азығын қажетті мөлшерде жеткізуге және Маңғыстау облысының шаруашылықтарына жайылымға, шабындыққа жер учаскелерін беруге келісілді», – деді Тұрымов орталық коммуникациялар қызметінде.