Алматыда Әбсаттар қажы Дербісәлінің кітабы жарық көрді

Алматыда академик, шығыстанушы, әдебиет зерттеушісі Әбсаттар қажы Дербісәлінің 2 кітабы жарық көрді, деп хабарлайды Almaty.tv.

Шәкірттері оның жазып қалдырған қолжазбаларын жинақтап шығарған. Бірінші кітапта Тараз қаласының X ғасырлық тарихы баяндалады. Онда араб, парсы, тілінде жазған 70-ке жуық ойшыл ғұламаның өмірі мен шығармашылығы түгел зерттелген. Бұл – студенттер, ғылыми жұмыспен айналысатын ұстаздар үшін әдістемелік құрал. Ал орыс тілінде жарық көрген екінші туындыда Орталық Азия халықтарының этнографиясы, өмір сүру салты мен мәдениеті жазылған.

– Әбсаттар ағаны ғылыми орта жақсы біледі. Себебі ол кісі Қазақстанда шығыстану ғылымының негізін қалаған. Осы деректер жайында 2 кітаптың тұсауы кесіліп отыр. Келешекте біздің жас мамандар осы кітаптарды негізгі дерек ретінде пайдаланып, зерттеу жұмысын жүргізуге септігін тигізеді деген үміттемін, – деді филология ғылымдарының докторы, профессор Ислам Жеменей.