Алматылық сарапшы Наурыз мейрамын тойлаудың жаңа форматы жайында пікір білдірді

2024 жылы елімізде Наурыз мейрамы жаңа форматта өтеді. Қазақстандықтар енді көктемнің келуін 10 күн – 14-23 наурыз аралығында тойлайды. «Наурызнаманың» онкүндігінің әр күні қоғамының ұлттық болмысы мен  алуан түрлілігін көрсететін белгілі бір тақырыптарға арналады, деп хабарлайды Almaty.tv.

Зиялы қауым өкілдері өзгерістердің қазіргі қоғамда дәстүрлі мерекенің сақталуына және дамуына септігін тигізетіндігін бірауыздан атап өтті.

Ақын, аудармашы, журналист, Қазақстан Жазушылар одағының, Ұлттық Құрылтайдың мүшесі Любовь Шашкова мерекенің жаңа форматы Наурыздың мәдени аспектілеріне көбірек назар аударуға мүмкіндік беріп, мәдени алмасу мен ұлттардың бірігуіне мүмкіндіктер туғызатынын атап өтті.

«Қазіргі Наурызды тойлауды Атырауда өткен Ұлттық Құрылтайдың үшінші отырысында бастап кеттік. Сол кезде бұл мерекенің жаңа форматы мен мазмұны айқындалды. 22 наурызда күн мен түннің теңелетін күні тойланатын ғасырлар қойнауындағы мейрам. Ұзақ қыстан, көктем келіп, ағайын-туыс бас қосып, бір-бірімен көріседі. Бұл күнді құттықтау және алғыс айту күні десекте болады. Осылайша әр күн жаңа мағыналарға толы болды. Биыл Алматыда мерекенің тойлануы ұнады. Мерекелік шеруді өткізу тамаша идея – күймелердің, киіз үйлердің, түйе керуендерінің қозғалысы, яғни мұның бәрі бізді ұлттық тарихпен, ата-бабаларымызбен, түп-тамырымызбен байланыстыратын ғасырлар бойына жалғасатын мерекеге шын мәнінде дем беріп, салт-дәстүрлеріміз бен әдет-ғұрыптарды сақтауға шақырады», - деп бөлісті Л.Шашкова.

Сондай-ақ ол Наурыз мейрамының табиғатпен тығыз байланысты екенін, оның келуі қоршаған ортаны аялау керектігін еске түсіретінін айтты. Мәселен, Наурыз мейрамында қоршаған ортаны тазалау, ағаш отырғызумен қатар, табиғатқа, оның сый-сыяпатына тағзым ету ретінде ертеден келе жатқан бұлақтың көзін ашу рәсімі орындалады.

Естеріңізге сала кетейік, Наурыз мейрамын тойлау жаңа тұжырымдама бойынша өтіп жатыр. Оған сәйкес, жыл сайын наурыздың 14-і мен 23-і аралығында қоғамның барлық саласын қамтуға арналған Наурызнама онкүндігі өтеді.

Бүгін 22 наурыз - Жаңа жыл. Бұл күні еліміздің барлық аймақтарында этноауылдар құрылып, ұлттық мәдени-спорттық шаралар, түрлі жәрмеңкелер өткізілуде.

23 наурыз – Тазару күні. Жаңа жылды жаңа мақсатпен, жаңа үмітпен қарсы алудың символы ретінде Наурызнаманың соңғы күні ретінде белгіленген. Бұл күні Қазақстанның барлық аймағында жалпыұлттық экологиялық акция өтеді.

Оқи отырыңыз: Президентке Наурыз мейрамына орай құттықтау жеделхаттары келіп жатыр