Алматылық Алмат Жұманов кезекті рекордын орнатты

Қазақтың титаны аталып кеткен Алмат Жұманов кезекті рекордын орнатты, деп хабарлайды Almaty.tv тілшісі.

Ол салмағы 24 жарым тонна әскери ұшақты орнынан қозғап, 1 метрге дейін жылжытты. Алматылық спортшының бұл көрсеткіші Қазақстан рекордтар кітабына еніп, елімізде ұшақ сүйреген жалғыз адам атанды. Бүгінде ел арасында Қажымұқан атанып кеткен Алмат Жұманов ұшақты 6 метрге дейін жылжытамын деп жоспарлапты. Алайда осыған дейін алған жарақаты сыр беріп, күші 1 метрге дейін сүйреуге жетті. Ең бастысы Қазақстан рекордтар кітабының өкілдері бұл нәтижені ресми түрде тіркеп, есепке алды.

«Мақсатым – қазақ халқында осындай мықты жігіттер бар екенін шетелдіктерге көрсетіп, еліміздің атын шығару. Олар бізді көріп, еліктесін. Интернетке кірсең шетелдіктерді көрсесің. Неге бізде жоқ, сол жағынан  дамытқым, көрсеткім келеді», – деді рекордшы Алмат Жұманов.

Алматтың бұл көрсеткіші Қазақстан КИнЭС рекордтар кітабына енген 3-нәтижесі. Ол осыған дейін 108 тонна болатын вагон тартып, елді бір таңғалдырған еді. Артынша 4 тонна болатын 3 көлікті беліне тіркеп, 280 келілік түйені 13 метрге дейін сүйреді.

«Наурыз мейрамында осы ұшақты 6 метрге сүйреген екен. Соны қайталаймын деп бізді шақырып еді. Бірақ 6 метрге жетпеді. Қазақстанда алғашқы көрсеткіш боп тіркелді», – деді Қазақстан рекордтар кітабының ресми өкілі Бақытжан Тастүлеков.

Алматтың ендігі мақсаты – салмағы 300 тонна вагон сүйреп, әлемдік Гиннес рекордтар кітабына ену.

Мерей Қанапиянов, Мейрам Исабеков, «Алматы» телеарнасы