|
Қоғам
24.05.2019 | 19:38

Алматыда домбыра пішіндес субұрқақ салынды

Соңғы үш жыл ішінде қалада 27 субұрқақ салынған және қалпына келтірілген

Алматыда домбыра пішіндес субұрқақ салынды

Алматыда жайлы қалалық орта қалыптастыру мақсатында жаңа субұрқақтар салу мен «ұмыт болғандарын» қалпына келтіру жұмыстары жалғасуда. Алматы әкімі Бауыржан Байбек жұмыс сапары кезінде Құрманғазы атындағы консерватория ғимараты алдындағы ең көне музыка аспабы - домбыра түрінде жасалған фонтанды көрді.

Қалада ең алғаш субұрқақ 1948 жылы Абай атындағы МАТОБ ғимараты жанындағы алаңқайда пайда болған еді. Қазіргі кезде Алматы аумағында 100-ге жуық субұрқақ бар. Соңғы үш жыл ішінде 27 субұрқақ салынған және қалпына келтірілген


Биыл Достық даңғылын Құрманғазы, Жамбыл көшелерінің қиылысында қалпына келтіру барысында және Абай атындағы ҚҰПУ алдында үлкен фонтан кешенін және екі құрғақ субұрқақ салу жоспарланған. 

Бұлардан өзге, Бауыржан Байбек Тұңғыш Президент атындағы саябақтағы орталық фонтанды қалпына келтіру және М.Әуезов атындағы драма театры алдындағы субұрқақ конструкцияларының 50 және одан көп пайызға ескіруіне орай, оларды қайта жасауды тапсырды.

Биылғы жылы қалалықтарды Абай даңғылындағы, Спорт және туризм академиясы алдындағы, бұрынғы Түрксіб ауруханасы алдындағы жаңа фонтандар қуанышқа бөлейді.

 Назарбаев даңғылы бойындағы ҚТЖ ғимараты алдындағы бұрынғы көлік тұрағының орнында жаңа фонтан пайда болды. Оларға жақын маңға бірнеше құрғақ субұрқақтар салынды.

Ұлттық кітапхана мен Байсейітов көшесінің арасына фонтан салынды. 

Лермонтов атындағы академиялық орыс драма театры алдындағы бос тұрған субұрқақ жөнделді.

Республика Сарайы алдындағы Абай алаңында бірнеше жаңа фонтандар пайда болды. 

Абылай хан даңғылы бойындағы Шевченко мен Қарасай көшелерінің қиылысындағы ескі субұрқақтар реконструкцияланды. Бұлардан өзге, Алматы-2 теміржол вокзалы алдында құрғақ субұрқақ іске қосылды.

Жаяу жүргінші кеңістігін қалыптастыру кезінде Панфилов, Жібек жолы көшелері мен «Астана» алаңында жеті фонтан салынды. Қайта жасалған Орталық саябақтың шығыс жағына жазғы сахна жанында алма ағашы бейнеленген жаңа фонтан пайда болды. Мұнда 10 жыл бойы бос тұрған ескі субұрқақ жөндеуден өтті.

Айта кетерлігі, 2015 жылы қалалықтардың талқылауынан соң қабылданған «Алматы-2020» бағдарламасы аясында мегаполисте тарихи орталықтың 60%, 600 көше мен 1400 ескі аулалар жөнделді. 

Көше жарығының үштен бірі диодты және энергия жинақтаушы шамдарға ауыстырылды, 300 км арық және 2000 км инженерлік желілер ауыстырылды. Қаланың барлық өтпелі жолдары жаңарды.

Биыл қаланың барлық көпқабатты үйлерінің 50 пайызын қамтитын тағы 600 ауланы жөндеу жоспарланған. 

120-дан астам көшеде орташа жөндеу басталды. 

Бұлардан өзге қаланың 14 ықшам аудандарында 456 көше салынуда. Қаланың шет аймақтарындағы бірқатар саябақтар, гүлзарлар мен серуен аймақтары абаттандырылады. 

Қала кеңістігінің қауіпсіздігі үшін 120-дан астам көшеге жаңа LED шамдары орнатылады.