Қаңтар оқиғасына қатысты 101 қылмыстық іс сотқа жіберілді

Қаңтар оқиғаларына қатысты 101 қылмыстық іс сотқа жіберілді, 62 адам сотталды. Бұл туралы Бас прокуратураның Қылмыстық қудалау қызметі бастығының орынбасары Елдос Қилымжанов айтты, деп хабарлайды Almaty.tv тілшісі.

Оның айтуынша, жедел-тергеу топтарының өндірісінде сотқа дейінгі 3 666 тергеп-тексеру ісі бар. Терроризм актілері мен жаппай тәртіпсіздіктер туралы істерден басқа, тонау, ұрлық, қаруды ұрлау, құқық қорғау органдарының қызметкерлеріне қатысты күш қолдану фактілері тергелуде.

«Қаңтар оқиғалары кезінде 4 мыңнан астам адам түрлі дәрежеде жарақат алған. Оның ішінде 2402-і – полиция қызметкерлері, 990-ы – қоғамдық тәртіпті қамтамасыз етуге тартылған әскери қызметшілер.

Ақтөбе қаласында ұялы телефон бейнежазбасының арқасында И. есімді азаматтың 5 қаңтарда ВАЗ-21014 автокөлігін басқарып, облыс әкімдігі алдында полицейлерді үлкен жылдамдықпен соққаны анықталды. Соның нәтижесінде 4 полицей дене жарақаттарымен ауруханаға жатқызылды», - дейді ҚР Бас Прокуратурасы қылмыстық қудалау қызметі бастығының орынбасары Елдос Қилымжанов.

Сонымен қатар қаңтар оқиғасында дүкендер мен банкомат тонағандар ұсталған. Тек өткен апта ішінде мүлікті және қаруды ұрлау фактілері бойынша 7 күдікті қолға түсіп, сот санкциясымен қамауға алынған.

Бұдан бөлек, Бас прокуратура қару-жарақты өз еркімен тапсырғандар жауапкершіліктен босатылатынын жеткізді

«Естеріңізге сала кетейік, тұлғалар атыс қаруын, оқ-дәрілері мен жарылғыш заттарды сақтағаны үшін ғана, егер олар ерікті түрде тапсырылса және әрекеттерінде басқа қылмыс құрамы болмаса, қылмыстық жауапкерішіліктен босатылады», - деді Елдос Қилымжанов.