Саяси қуғын-сүргін құрбандары музейінде репрессияға ұшырағандардың тізімін жаңарту шаралары қарастырылып жатыр. Аталған жоба мемлекеттік деңгейде жүзеге асып, жазықсыз жапа шеккен 4,5 миллион адамның есімі қара мәрмәрға қашалмақ. Бүгінде тізімге 2 миллионнан аса азаматтың аты жазылған. Музей жанынан ашылады деп жоспарланған кешен «Ата бейіт» мемориалды алаңы деп аталады.
«Аты аталмай келе жатқан құрбандарды анықтау үшін «Жетісудың шерлі тарихы» деген жоба ұйымдастырылды. Осы жобаның аясында Алматы облысының өңірлеріне арналған кітапшалар шығардық. Сонымен қатар, музейдің жанында «Ата бейіт» деген үлкен комплекстің жоспарлары таныстырылуда», – деді Саяси қуғын-сүргін құрбандары музейінің меңгерушісі Мейіржан Мұсабаев.
