Бір тәуліктен бері жылу мен жарықсыз отырған Жаңатасқа электр қуаты берілді

Төтенше жағдай жарияланған Жаңатас қаласына электр энергиясы берілді, деп хабарлайды Almaty.tv тілшісі Жамбыл облысы әкімдігіне сілтеме жасап.

Облыс әкімі Нұржан Нұржігітовтің Сарысу ауданындағы жұмыс сапары төтенше жағдай салдарын жою бойынша жедел штаб отырысымен түйінделді.

Басқосуда аймақ басшысы ауданның елді мекендерін электр энергиясымен қамту, Жаңатас қаласына жылу беру бойынша жұмыстарды жеделдетуді тапсырды.

Қазіргі кезде Жаңатас қаласына электр энергиясы беріліп үлгерді. Ендігі кезекте орталық қазандықтың жұмысын жандандыру бойынша шаралар қолға алынып жатыр.

Барлық саладағы қызметтің үйлесімді әрекетінің маңыздылығын баса айтқан облыс әкімі жауаптыларға нақты тапсырмалар жүктеді.

Еске сала кетейік, Жамбыл облысының Сарысу ауданында табиғи сипаттағы төтенше жағдай жарияланған еді.

Қаладағы қатты желден кейін жылусыз қалған мектептер генератормен жылытылады.