Мен мұны жасырған едім: Димаш Кудайберген жеке өмірі туралы күтпеген мәлімдеме жасады

Қазақстандық әнші Димаш Кудайберген Астана қаласында өткен форумда жеке өміріне қатысты қызықты мәліметтермен бөлісті. Өнер иесі сахнадан тыс уақытта немен айналысатынын айтып берді, деп хабарлайды Almaty.tv тілшісі NUR.KZ - ке сілтеме жасап.

Әншінің айтуынша, ол ұзақ уақыт бойы көпшілікке айтпаған ерекше хоббиі бар.

«Менің жалғыз хоббиім бар — бұрын оны жасырған едім, бірақ жақында Instagram-да бөлістім — мен мотоцикл айдағанды жақсы көремін», — деді ол.

Сонымен қатар, әнші күнделікті өмірі өте тыныш өтетінін атап өтті. Бос уақытында ол жақын достарымен үйде отырып, еркін әңгімелескенді жөн көреді.

«Үй — студия»: өмір салты мен ұстанымы

Димаш Кудайберген түнгі өмір мен ойын-сауық кештерін ұнатпайтынын жасырмады. Оның айтуынша, өмірінің негізгі ырғағы — тұрақты еңбек.

«Әдетте бәрі қарапайым: үй — студия, студия — үй», — деді әнші.

Өнер иесі жастық шақ туралы да өз ойын жеткізді. Оның пікірінше, дәл осы кезеңде адам өзін дамытуға және еңбек етуге көңіл бөлуі керек.

«Егер жастық шақтың бәрін қыдырып өткізсең, 40-тан кейін ештеңеге қол жеткізбеуің мүмкін. Сол жасқа дейін еңбек ету керек, ал демалыс кейін болады», — деді ол.

Сүйікті фильмдері мен жанкүйерлерге кеңесі

Көрермендердің сұрақтарына жауап берген Димаш Кудайберген киноға қатысты талғамы туралы да айтты. Белгілі болғандай, ол қорқынышты фильмдерді жақсы көреді.

Сондай-ақ, әнші жанкүйерлеріне қысқа әрі есте қаларлық кеңес берді:

«Қазақ тілін үйреніңіздер», — деп күлді ол.

Осылайша, Димаш Кудайберген сахнадан тыс өмірінде де тәртіпті, қарапайым өмір салтын ұстанып, үнемі дамуға мән беретінін көрсетті.

Оқи отырыңыз: Актрисаның ашық сыры: Әсел Сәдуақасова оқырмандарының сұрақтарына жауап берді