Ақмола облысында екі адамды өлтірген екеуге сот үкімі шықты

Ақмола облысында екі адамды өлтіріп, үшіншісін де өлтіруге оқталған екі ер адамға сот үкімі шықты, деп хабарлайды Аlmaty.tv.

Ақмола облысының қылмыстық істер жөніндегі мамандандырылған ауданаралық сотының баспасөз қызметінен хабарлағандай, Б. және К. Есчімді екі ер адамға қатысты екі адамды өлтірді және үшінші адамды өлтіруге оқталды деген айыппен қылмыстық іс қаралды.

«Белгілі болғандай, 2024 жылдың тамызында Ақкөл қаласында Б. бұрын болған жанжалды себеп қылып, К.-ны үш адамды өлтіруге итермелегендіктен, К. мылтықтан екі адамды өлтірген, ал үшінші жәбірленуші оқиға орнынан қашып үлгерген», - делінген хабарламада.

Алқабилердің шешімімен Б. кісі өлтіруге итермелегені үшін және К. екі адамды, адамдар тобында қастандықпен өлтіргені үшін кінәлі деп танылды.

Сонымен қатар К. атыс қаруды заңсыз сақтағаны және өзімен алып жүргені үшін кінәлі деп танылды.

Үшінші адамды өлтіруге оқталу фактісі бойынша қылмыс құрамының болмауына байланысты алқабилердің шешімімен Б. және К. ақталды.

Жазаны тағайындауда сот, сотталушыларда жас балалардың болуын және жәбірленушілерді ауруханаға жеткізіп, алғашқы медициналық жәрдем көрсеткендерін жеңілдететін мән-жайлар деп ескерді.

Масаң күйде қылмыс жасағаны ауырлататын жағдай деп танылды.

«Сот үкімімен Б. 18 жылға бас бостандығынан айырылды және алкоголизмнен мәжбүрлеп емдеу тағайындалды, К. 18 жыл 6 айға бас бостандығынан айырылды. Сотталғандардың әрқайсысынан жәбірленушілердің пайдасына 20 млн теңгеден моральдық зиян өндірілді», - делінген сот хабарламасында.  

Үкім заңды күшіне енген жоқ.

Оқи отырыңыз: Алматыда 25 адамның атынан заңсыз несие рәсімдеген күдікті ұсталды