Меншікті өндіріс
Біз әлеуметтік желілердеміз
Биыл қаладағы мерекелік шаралардың негізгі бөлігі 19-20 қыркүйекке жоспарланған
Алматы күні жыл сайын қыркүйектің үшінші жексенбісінде аталып өтеді. Алайда қала мерекесі қашаннан бері дәл осы уақытта тойланып жүр және неге оның күні өзгерген? Бұл туралы Аlmaty.tv анықтап көрді.
Қазір Алматы күні қыркүйектің үшінші жексенбісіне бекітілген. 2026 жылы бұл күн 20 қыркүйекке түсіп отыр. Қалада мерекелік шаралардың негізгі бөлігі 19-20 қыркүйекке жоспарланған.
Алматы күні бұрын қазан айында аталып келген
Тарихи деректерге сүйенсек, Алматы күні тәуелсіздіктің алғашқы жылдарынан бастап қазанның бірінші жексенбісінде тойланған. Мерекенің күзгі уақытта өтуі сол кезеңдегі қала өмірімен де байланысты болған. Яғни, қазан айы күзгі өнім жинау кезеңіне сәйкес келген.
Кейін бұл датаның бірнеше қолайсыздығы байқалған. Қазанның алғашқы жексенбісі кей жылдары 1 қазанға сәйкес келетін. Ал бұл күн Қарттар күні және Мұғалімдер күнімен тұспа-тұс келетіндіктен, мерекелік іс-шаралар бір уақытқа шоғырланып қалатын.
Сонымен қатар қазан айының басындағы ауа райының тұрақсыздығы да ескерілген.
2009 жылы мереке қыркүйекке ауыстырылды
2009 жылғы маусымда Алматы қаласының мәслихатының XIX сессиясында Қала күнін қазанның бірінші жексенбісінен қыркүйектің үшінші жексенбісіне ауыстыру мәселесі қаралды. Сол кезде бұл ұсынысты қала әкімдігінің баспасөз қызметі де хабарлаған.
Сол жылдан бері Алматы күні қыркүйектің үшінші жексенбісінде аталып келеді. Яғни мерекенің қыркүйекке ауысуы қаланың құрылған нақты күніне байланысты емес. Бұл — Қала күнін атап өтудің күнтізбелік тәртібінің өзгеруі.
Айта кетейік, Алматының тарихы 1854 жылмен ғана шектелмейді. Қала аумағы мен оның маңындағы археологиялық зерттеулер бұл өңірде көне дәуірлерден бері елді мекендер мен қалалық мәдениет қалыптасқанын көрсетеді. Ұлы Жібек жолы бойында орналасқан Жетісу өңірі де ғасырлар бойы сауда мен мәдениеттің тоғысқан жері болған. Ал 1854 жылы Верный бекінісінің негізі қалануы Алматы тарихындағы кейінгі маңызды кезеңдердің бірі болды. Бүгінде қаланың бай тарихы бірнеше дәуірді қамтитын тарихи-мәдени мұра ретінде жалғасып келеді.
Бүгінде қыркүйектің үшінші жексенбісі Алматы тұрғындары үшін қаланың туған күнін атап өтетін дәстүрлі датаға айналды. Мереке аясында концерттер, көрмелер, фестивальдер, спорттық және отбасылық іс-шаралар ұйымдастырылады.
ОҚи отырыңыз: Мың жылдық тарихы бар Алматы жайлы қызықты деректер