Алматы – ортақ үйіміз: Бостандық ауданында 17 арнайы техника тазалық жұмыстарын жүргізуде

Қаланың экологиялық жағдайын жақсартуға бағытталған «Таза Қазақстан» акциясы Алматының Бостандық ауданында жалғасып жатыр. Науқанға 17 арнайы техника мен 60 жол жұмысшысы жұмылдырылды, деп хабарлайды Almaty.tv.

«Алматы – ортақ үйіміз» бастамасы шеңберінде мердігер ұйымдар қала көшелері мен аулаларды қоқыстан тазартып, абаттандыру шараларын жүргізіп жатыр.

 «Наурызбай көшесінің Абай даңғылынан Тимирязев көшесіне дейінгі аралықта арық, жаяу жүргінші жолдарын, сондай-ақ үйлердің арасын да тазалап жатқанын байқауға болады. Науқанның басты мақсаты – көрікті, керемет қаламызды таза ұстау», – деді Бостандық ауданы әкімі аппараты көріктендіру бөлімінің бас инспекторы Нұрсұлтан Оразымбетов

Жол жиегі мен жаяу жүргіншілер жолдарын сыпыру, арық жүйелерін тазарту және қар үйінділерін шығару жұмыстары 1 ай көлемінде жүргізіледі. Ал жұмысшылар қала тұрғындарын қоқыс тастамауға шақырды.

 «Жастарды қаламызды тазалауға атсалыса дейміз. Көктем келе жатыр, қоқыс тастамаңыздар», – деді жұмысшы Венера Қисанова.

Оқи отырыңыз: Алматыда көшелер мен инфрақұрылымды тазарту бойынша ауқымды жұмыс жүргізілуде