Алматыдағы мектепте Жексенбек Әділов атындағы математика кабинеті ашылды

Алматыдағы № 75 мектепте Ұлттық ғылым академиясының академигі, экономика ғылымдарының докторы Әділов Жексенбек Мәкеұлы атындағы математика кабинеті ашылды, деп хабарлайды Almaty.tv.

Аталған білім ордасының түлегі сыныпты қажетті жабдықтармен қамтамасыз етіп, келешекте оқушыларға арнайы дәріс өткізуді де қолға алмақ. Еліміздің белді жоғары оқу орындарында ректорлық қызмет атқарған Жексенбек Әділов – 150-ден астам ғылыми еңбектің авторы. Оның басшылығымен жаңа техникалық мамандықтар ашылып, бірегей инженерлік зертханалар құрылған. Нәтижесінде экономиканың нақты секторына ғылыми зерттеулерді енгізу айтарлықтай артқан.

"Бірінші кезекте айтарым, мектеп – киелі орын, білімнің бастауы. Менің түлеп ұшқаныма 57 жыл болды. Өскелең ұрпақты ғылым жолына баулып, олардың сапалы білім алуына жағдай жасау – әр азаматтың міндеті", – деді Ұлттық ғылым академиясының академигі Жексенбек Әділов.

Оқи отырыңыз: Ұлы Жібек жолымен-2024: Алматыда балалар әдебиетінің бүгінгі жай-күйі талданды