ДНҚ-тест және жасанды интеллект: Алматыда сирек кездесетін ауруларды анықтау жолдары талқылануда

Әлем бойынша 350 миллионнан аса адам сирек кездесетін генетикалық аурулардан зардап шегеді. Мұндай дертке шалдыққан көп науқасқа нақты диагноз қою ұзаққа созылады. Бүгінде бұл мәселені шешу үшін заманауи технологиялар пайда болып, тың әдістер қолданылып келеді. Саладағы жетістіктер Алматыда өтіп жатқан геномдық және генетикалық технологияларға арналған халықаралық конференцияда талқыланып жатыр, деп хабарлайды Аlmaty.tv.

Алматыда «Клиникалық тәжірибедегі геномдық және генетикалық технологиялар» атты халықаралық конференция жұмысын бастады. Екі күнге созылатын жиында сегіз елден келген мамандар ДНҚ зерттеулерінің тұқым қуалайтын және сирек кездесетін ауруларды ерте анықтаудағы рөлін талқылап жатыр. Сонымен қатар аурулардың даму қаупін болжау және әр науқасқа жеке ем тағайындау мәселелері де күн тәртібінде. Одан бөлек, жиынға қатысушылар жасанды интеллектінің қауқарына ерекше назар аударды. 

«Геномдық технологияларды дамыту мен енгізу медициналық көмектің сапасына тікелей әсер етеді. Заманауи диагностикалық әдістер ауруларды ерте кезеңде анықтауға, оның ішінде сирек және тұқым қуалайтын патологияларды дер кезінде табуға мүмкіндік береді, бұл диагноз қою дәлдігін арттырып, емдеудің тиімділігін жоғарылатады», – деді Қазақстанның «Медициналық генетиктер қауымдастығы» РҚБ президенті Гүлнәр Святова.

Бүгінде геномды талдау бұрынғыға қарағанда әлдеқайда жылдам жүргізіледі. Соның арқасында дәрігерлер дертті ерте анықтап, уақытылы ем бастай алады. Конференцияда сирек кездесетін ауруларға ерекше назар аударылды. Сондай-ақ мамандардың сөзінше, жылдар бойы себебі табылмаған сырқат көп жағдайда генетикалық зерттеу арқылы анықталады.

«Қазақстанда сапалы ДНҚ-тесттерге сұраныс жоғары әрі бұл бағыттың әлеуеті зор екенін байқап отырмыз. Сол себепті жұмысымызды жалғастырамыз. Өткен жылы да келгенбіз, биыл тағы арнайы қатысып отырмыз. Өйткені бұл конференция – маңызды басқосу. Дәрігерлердің нақты сұранысын түсініп, сирек аурумен ауыратын қазақстандық науқастарға қалай көмектесе алатынымызды айқындай аламыз», – деді шетелдік компания өкілі Минсу Ким.

Сарапшылардың пікірінше, ауруға шалдыққан азаматтарға ем жалпыға ортақ тәсілмен емес, әр адамның генетикалық ерекшелігіне сай таңдалады. Сондықтан халықаралық кездесу тәжірибе алмасумен шектелмей, елдегі медицинаны дамытып, қолжетімді етуге ықпал етеді.

Гүлмарал Изатқызы, Адель Ақжаркенова, Ғани Қалуов

Оқи отырыңыз: Алматыда жастар арасындағы жұмыссыздық деңгейі айтарлықтай төмендеді