ДСМ аутизм туралы жалған мәлімдемелерге қатысты пікір білдірді

Әлеуметтік желілерде «аутизмді толық емдеу», «жалған аутизм» және басқа да нақты емес теориялар туралы қызу мәлімдемелер көбейіп келеді. ҚР Денсаулық сақтау министрлігі азаматтарды осындай ақпаратқа сын көзбен қарауға және тек дәлелді медицинаға сенуге шақырады, деп хабарлайды Аlmaty.tv. 

Министрлік мәліметінше, аутизм спектрінің бұзылыстары (AСБ) — бұл халықаралық медициналық қауымдастық растаған нейродамудың ресми танылған ерекшелігі.

Аутизм «тәрбиенің дұрыс болмауынан», гаджеттерден немесе вакцинациялаудан туындамайды.

«Бүгінгі күні аутизмді «тез және толық емдеуге» қабілетті ғылыми дәлелденген әдіс жоқ. Ғажайып терапиялардың, күмәнді дәрі-дәрмектердің және жалған ғылыми әдістердің уәделері отбасыларды адастырып қана қоймай, кәсіби көмек алу үшін аса қымбат уақытты жоғалтуға әкелуі мүмкін.

Бала үшін ең маңыздысы — ерте анықтау, уақтылы түзету, мамандардың сүйемелдеуі және отбасының қатысуы.

Балалардың денсаулығы хайптың, манипуляцияның және жалған сенсацияның тақырыбы емес», - делінген ДСМ хабарламасында.

Оқи отырыңыз: Еліміздің бірқатар өңірінде есірткі өткізу арналары жойылды - ІІМ