Ғылым елді ауқымды жаңғыртудың негізіне айналуы тиіс – Ақылбек Күрішбаев Жолдау туралы

Қазақстан Республикасы Президентінің жанындағы Қазақстан Республикасы Ұлттық ғылым академиясының президенті Ақылбек Күрішбаев Мемлекет басшысы Қасым-Жомарт Тоқаевтың Қазақстан халқына арнаған «Жаңа тарихи кезеңдегі Қазақстанның өзекті міндеттері» атты Жолдауында белгіленген басымдықтарды қолдайтынын білдірді, деп хабарлайды Almaty.tv.

Академиктің пікірінше, Жолдауда көзделген ауқымды өзгерістерді жүзеге асыру отандық ғылымның жүйелі түрде қатысуын, заманауи технологияларды енгізуді және экономиканың барлық негізгі салаларында ғылыми негізделген шешімдер қабылдауды талап етеді.

Ақылбек Күрішбаев әлеуметтік, көлік және инженерлік инфрақұрылымды ауқымды жаңартуды көздейтін «Халықтық құрылыс» бастамасына ерекше назар аударды. Ол құрылыс жобаларының тиімділігін тек салынған нысандар мен төселген жолдардың шақырым санына қарап емес, олардың сапасы, ұзақ мерзімділігі және халықтың нақты қажеттіліктеріне сәйкестігі бойынша бағалау қажеттігін атап өтті.

Ғалым автомобиль жолдарының сапасы мәселесіне де жеке тоқталды.

«Бүгінде жол салу – бұл жай ғана асфальт төсеу емес. Зертханалық жағдайда материалдың жоғары беріктік көрсетуі оның Қазақстанның күрделі табиғи-климаттық жағдайларында ұзақ қызмет ететініне кепілдік бермейді. Сондықтан сапалы деректер жинауға, физикалық тұрғыдан негізделген модельдеуге, тәуелсіз тексеруге және содан кейін ғана тәжірибеге енгізуге негізделген толыққанды ғылыми цикл қажет», – деді Ақылбек Күрішбаев.

Осы бағытты дамытудағы нақты қадам ретінде ол Ұлттық ғылым академиясы жанынан Көлік ғылымдары мен технологиялары институтының құрылып жатқанын айтты. Институттың қызметі қолданбалы зерттеулерді дамытуға, заманауи инженерлік шешімдер әзірлеуге және отандық ғылыми жаңалықтарды көлік саласына енгізуге бағытталған.

Сонымен қатар пайдалану мерзімі ұзартылған автомобиль жолдарын жобалау және пайдалану технологияларын әзірлеуге арналған ғылыми-техникалық бағдарлама бойынша жұмыс жүргізілуде. Оның маңызды бағыттарының бірі жаңа материалдарды зерттеу, инженерлік шешімдерді сынақтан өткізу және озық технологияларды Қазақстанның климаттық әрі пайдалану жағдайларына бейімдеу болмақ.

Бұл бағытта халықаралық ғылыми ынтымақтастықты, оның ішінде Қытайдың зерттеу ұйымдарымен әріптестікті дамыту көзделіп отыр.

Академиктің айтуынша, Жолдауда белгіленген ауыл шаруашылығын жаңғырту, су ресурстарын ұтымды пайдалану, энергетика, өнеркәсіп және жасанды интеллектіні дамыту сияқты басқа да стратегиялық бағыттарда дәл осындай ғылыми тәсіл қажет.

Ол ғылым жобаларды іске асырудың тек соңғы кезеңінде ғана тартылмауы керектігін атап өтті. Ғылыми сараптама міндет қою мен жобаны әзірлеуден бастап, оны іс жүзінде жүзеге асыру және нәтижелерін бағалауға дейінгі барлық процесті қамтуы тиіс.

«Әрбір реформаның алдында ғылыми негіздеме болуы керек, әрбір құрылыстың негізінде нақты есептеулер жатуы тиіс, ал әрбір технологияны енгізу сынақтан өткізілуі қажет. Сонда ғана мемлекеттік инвестициялар нақты нәтижелерге айналып, қоғамға шынайы пайда әкеледі», – деп атап өтті Ақылбек Күрішбаев.

Осылайша, Жолдауда белгіленген басымдықтар ғылым, білім және өндіріс интеграциясын дамытуға жаңа мүмкіндіктер ашады. Басты міндет – жекелеген ғылыми әзірлемелерден оларды тәжірибеде кеңінен қолдануға, жоғары білікті мамандар даярлауға және өзіндік технологиялық базаны қалыптастыруға көшу.

Бұл тәсілдерді жүзеге асыру Қазақстанның ғылыми әлеуетін нығайтуға, инфрақұрылым сапасын арттыруға және өңірлердің тұрақты дамуын қамтамасыз етуге мүмкіндік береді.

Оқи отырыңыз: Инфрақұрылым жобаларын жүзе асыруға Ұлттық қордан 6,5 трлн теңге бағытталады