ҚМА азаматтарды телефон және интернет алаяқтарынан сақ болуға шақырды

Қаржылық мониторинг агенттігі соңғы уақытта көбейіп кеткен телефон және интернет арқылы жасалатын алаяқтық әрекеттерге қатысты ескерту жасады, деп хабарлайды Аlmaty.tv агенттіктің баспасөз қызметіне сілтеме жасап.

Агенттікке белгісіз тұлғалар атынан хабарласып, өздерін «заңгер» немесе «тексеруші маман» ретінде таныстырып, «сіздің ұйымға қатысты тексеріс басталды» деген мазмұндағы жалған хабарламалар таратылып жатқаны туралы мәліметтер түскен.

Агенттік мұндай хаттар жібермейді және телефон арқылы жеке деректерді сұрамайды.

ҚМА өкілдері азаматтардан шот нөмірін, SMS-кодтарды, жеке құжаттар мен өзге де құпия ақпаратты ешқашан талап етпейді.

Алаяқтықтың негізгі белгілері:

• ҚМА немесе ҰҚК атынан жалған хаттар таратып, ұйым қызметкерлеріне қатысты «мінездеме» не «ақпарат беру» туралы өтініш жолданады.
• WhatsApp арқылы ұйым басшысы немесе есепшісінің атынан жазып, олардың суреттері мен есімдерін пайдаланады.
• Алаяқтар хабарламаларды мемлекеттік тілде жаза отырып, сенім тудырады.
• Кейін өзін «заңгер» деп таныстырған адам хабарласып, бұл ақпарат «құпия» екенін айтып, оны ешкімге жария етпеуді талап етеді.
• Бір мезетте бірнеше қоңырау мен хабарлама келіп, қысым көрсетіледі. Мұндай тәсіл жәбірленушіні шатастырып, ойлануға мұрша бермейді.
• Нәтижесінде адамдар өз жинақтарын шешіп, көрсетілген шоттарға өздері аударады.

ҚМА мәліметінше, мұндай жағдайлар көбіне зейнет жасындағы азаматтарға бағытталып, олардың сенімін пайдалану арқылы жүзеге асады.

Егер сіз алаяқтардың нысанасына айналсаңыз:

• Сабыр сақтап, әңгімені дереу тоқтатыңыз.
• Сілтемелер мен тіркемелерді ашпаңыз.
• Бөгде адамдарға ақша аудармаңыз.
• Хаттың рас-өтірігін жұмыс орныңыздағы бухгалтерия немесе заң бөлімі арқылы нақтылаңыз.
• Телефон нөмірін сақтап, құқық қорғау органдарына хабарлаңыз.
• Әріптестеріңізді және туыстарыңызды осындай қауіп жөнінде ескертіңіз.

ҚМА азаматтарды мұндай хабарламаларға сенбеуге және өз деректерін бөгде адамдарға бермеуге шақырады. Тек сақтық шараларын ұстану арқылы алаяқтарға тосқауыл қоюға болады.

Оқи отырыңыз: Атыраудағы 7 жастағы қыз өлімі: педофилге сот үкімі шықты