Көк жүзіндегі күзет: әуе қорғаныс күштерінің әлеуеті

Еліміздің қауіпсіздігі мен тыныштығын қамтамасыз етуде Әуе қорғанысы күштерінің орны ерек, деп хабарлайды  Almaty.tv. 

Әуе қорғанысы күштеріндегі тікұшақтар

Ми-17 – әлемдегі ең кең тараған тікұшақтардың бірі. Өйткені, ол – көпмақсатты, әмбебап әрі биікте ұшатын техникалық сипаттамалары ауқымды.

Бұл техника Құрлық әскерлері бөлімшелерінің ұтқырлығын арттыруға, қару-жарақ пен жеке құрамды жеткізуге, берілген нысаналарды жоюға арналған. Сондай-ақ таулы жерлерде және жоғары температурада жауынгерлік тапсырмаларды орындай алады.

Mи-35М – ұрыс даласында Құрлық әскерлерін әуеден қолдауға арналған тікұшақ.

Ол қарсыластың сауытты техникасы мен тірі күшін жоюға бағытталған.

Әуе қорғанысы күштері Ми-8 және Ми-171 тікұшақтарын пайдаланып, десантты түсіру және оны атыспен қолдау жұмыстарын жүргізеді.

Сонымен қатар бұл тікұшақтар атыс нүктелерін жоюға, оқ-дәрі, қару-жарақ, жүктер, өнімдер мен дәрі-дәрмектерді тасымалдауға арналған. Олардың міндетіне сондай-ақ қарсыласқа кедергі жасау және жараланғандарды ұрыс алаңынан эвакуациялау кіреді. Бұл техниканың көпқырлы қолданылуы әскери операциялардың тиімділігін арттыруға бағытталған.

ЕО-145 және Н-145 ТЖМ тікұшақтары төтенше жағдай болған аймақтардан зардап шеккендерді эвакуациялауға бағытталған. Сонымен қатар олардың қызметі – табиғи апаттардың салдарын жою, гуманитарлық жүктерді тасымалдау, іздестіру-құтқару жұмыстарын жүргізу және өрт сөндіру. ТЖМ авиациясы республика аумағында да, шетелдерде де ең жауапты міндеттерді бірнеше рет орындады.

Әуе қорғанысы күштеріндегі ұшақтар

C-295 ұшағы 9 тоннаға дейін жүк не толық қаруланған 70-тей әскери қызметшіні тасымалдауға, сондай-ақ 5 000 шақырымға дейінгі қашықтықты еңсеруге қабілетті.

Ол заманауи навигациялық жүйемен және қозғалтқыштардың жұмысын бақылау жүйесімен жарақталған.

L-410 – жеңіл, көпмақсатты, қос моторлы, жолаушы және жүк тасымалына арналған ұшақ.

Оның ерекшелігі – қонғанда, күй талғамайды. Жазда – шөп, қыста – қар басқан алаңқайларға және ұшу-қону жолағы қысқа әуеайлақтарға қона береді. 19 жолаушыны немесе 1 800 келі жүкті 1 500 шақырымға дейін тасымалдай алады. 

L-39 екі орындық, оқу-жауынгерлік ұшағы әуе күштерінің курсанттарын кез келген ауа райында ұшуға үйретуге арналған.

Ол әуеде, құрлықта және теңізде іс-қимыл дағдыларын жаттықтыру үшін қолданылады. Сонымен қатар түнгі рейстер мен әуе нысандарын барлауды, жердегі объектілерге соққы беруді пысықтау үшін пайдаланылады. 

Ту-154 ұшағы Қорғаныс министрлігі басшылығының әуедегі командалық пункті саналады.

Ол – сенімді әрі көп функциялы әуе көлігі. Ішкі және халықаралық бағыттар бойынша тасымалдауға арналған. Ұшақ 150-180 шамасындағы әскери қызметшіні 3 000-нан 5 000 шақырымға дейінгі қашықтыққа жеткізуге қабілетті. Сондай-ақ ішін жүк тасымалдауға бейімдеуге болады. 

A-400M – әртүрлі тапсырмаларды орындауға бағытталған көпмақсатты ұшақ.

Ол – заманауи төрт қозғалтқышты, соңғы буынға жататын техника. Еліміздің әуе қорғанысы күштері жарағына 2024 жылдың соңында қосылған. Бұл әуе көлігі әскери мақсаттағы тасымалда, медициналық эвакуациялауда және гуманитарлық миссияларда қолданылады.

Су-30СМ жойғыштары еліміздің әр түкпірінде күн сайын жауынгерлік кезекшілік атқарады.

Көпмақсатты, ауыр майданға арналған әуе көлігі күндіз-түні, әртүрлі ауа-райында жауынгерлік міндеттерді орындай алады. Ол әуе нысандарын да, жердегі объектілерді де жоюға қабілетті. Ұшақ көптеген қару-жарақпен және борттағы радиоэлектрондық жабдықтардың заманауи кешенімен жарақталған. Нақтырақ айтқанда, онда басқарылатын зымыран қаруы мен авиациялық қару орнатылған. Сонымен бірге, Су-30СМ-де 1,5 келіге дейінгі калибрлі бомбалар, зеңбірек қаруы және заманауи навигация жүйесі бар.

Су-25 – әскери шабуыл ұшағы. Бұл техника сипаттамасына байланысты «ұшатын танк» аталып кеткен. Өйткені, кез келген ауа райында жауынгерлік тапсырманы орындайды.

Көпмақсатты, ауыр майданға арналған әуе көлігі күндіз-түні, әртүрлі ауа-райында жауынгерлік міндеттерді орындай алады. Ол әуе нысандарын да, жердегі объектілерді де жоюға қабілетті. Ұшақ көптеген қару-жарақпен және борттағы радиоэлектрондық жабдықтардың заманауи кешенімен жарақталған. Нақтырақ айтқанда, онда басқарылатын зымыран қаруы мен авиациялық қару орнатылған. Сонымен бірге, Су-30СМ-де 1,5 келіге дейінгі калибрлі бомбалар, зеңбірек қаруы және заманауи навигация жүйесі бар.

Су-25 – әскери шабуыл ұшағы. Бұл техника сипаттамасына байланысты «ұшатын танк» аталып кеткен. Өйткені, кез келген ауа райында жауынгерлік тапсырманы орындайды.

Оны ұрыс даласында нысана нақты көрінгенде қолдануға болады. Не болмаса, координаттары белгілі объектілерді жоя алады. Су-25 құрлық әскерлерін әуеден қолдауға арналған. 

Дереккөз: ҚазАқпарат