Магистратураға түсуге арналған кешенді тестілеу қорытындысы жарияланды

58 мыңға жуық адам магистратураға түсу үшін кешенді тестілеу тапсырды. Ғылыми-педагогикалық бағыт бойынша орташа көрсеткіш 77 балды, бейінді бағыт бойынша 24 балл құрады. Ең жоғары балл – 139, деп хабарлайды Almaty.tv тілшісі. 

Тестілеу барысында 94 қатысушының нәтижесі жойылды. Оның ішінде 69 оқуға түсуші смартфон, шпаргалка және басқа да тыйым салынған заттарды алып өтуге тырысқаны үшін тест тапсыру мүмкіндігінен айырылды. Кешенді тестілеу кезінде ережелерді бұзғаны үшін аудиториядан 25 адам шығарылып, олардың нәтижелері жойылды.

Ғылыми-педагогикалық бағыт бойынша магистратураға түсу үшін кемінде 75 балл, бейіндік бағыт бойынша кемінде 30 балл жинау қажет.

Грант конкурсына құжаттарды қабылдау 12-18 тамыз аралығында жүзеге асырылады, ал грант иегерлерінің тізімі 25 тамызға дейін жарияланады. Болашақ магистранттардың ЖЖОКБҰ-ға қабылдануы 28 тамызға дейін аяқталады.

Конкурсқа қатысу үшін келесі құжаттарды тапсыру қажет: жеке куәліктің көшірмесі, жоғары білімі туралы құжат (диплом және қосымшасы); КТ сертификаты және шет тілін меңгергендігін растайтын халықаралық сертификаттар (бар болған жағдайда).

Құжаттарды тапсыру кезінде оқуға түсуші білім беру бағдарламаларының бір тобын және үш жоғары оқу орнын көрсете алады.

Оқи отырыңыз: Биыл мектеп оқушыларына көмек көрсетуге 23 миллиард теңге бөлінеді