Мейірімділік эстафетасы: Астанада Жеңіс күніне орай ерекше акция өтті

Елорданың Достық үйі Ұлы Отан соғысындағы Жеңістің 80 жылдығына орай «Мейірімділік пен естелік эстафетасы» акциясын ұйымдастырды, деп хабарлайды Аlmaty.tv елорда әкімдігінің баспасөз қызметіне сілтеме жасап.

Іс-шара аясында тыл еңбеккерлерін алдағы мерекемен құттықтап, Жеңіс жолында қосқан үлестері үшін алғыс білдіріп, 30 азық-түлік себетін табыс етті.

Акцияға елордалық ҚХА ақсақалдар кеңесінің төрағасы мен мүшесі Бақытжан Ерсаев, Владимир Божко, қалалық ҚХА мүшелері мен жастары, Астана әкімдігінің өкілдері, сондай-ақ «Қоғамдық келісім» КММ басшылығы мен қызметкерлері қатысты.

Акцияға қатысушылар еңбек ардагерлерінің үйін аралап, оларға естелік сыйлықтар табыстады.

«Осы акцияның қатысушыларына арнайы құттықтап келіп, сыйлықтар табыс еткені үшін алғыс айтамыз. Бүгінгідей керемет көңіл-күйде патриоттық әндер есіме түсіп отыр. Баршаңызды Ұлы Отан соғысындағы Жеңіс күнімен, мерекенің 80 жылдығымен құттықтаймын! Сіздерге денсаулық, игілік, өмірде сәттілік және ел игілігі жолында атқаратын жұмыстарыңызға үлкен күш тілеймін!» — деді тыл еңбеккері Надежда Кириленко.

Іс-шара өз өмірін құрбандыққа тігіп, еңбегімен Жеңісті жақындатқандарға тарихи естелік пен құрметтің маңыздылығын еске салды.

«Біз тарихқа, яғни бізге бейбіт өмір сыйлап кеткен ата-бабаларымыздың рухына тағзым етеміз. Бүгін жастармен бірлесіп, еңбек ардагерлерін келе жатқан мерекемен құттықтадық. Елордалық ҚХА-ның жастары аға буынмен бірге осындай акцияларға белсенді қатысқаны қуантады. Бұл – еліміздің болашағы үшін үлгі боларлық іс», — деп атап өтті Бақытжан Ертаев.

Айта кетейік, Астанада 7 мамырда Жеңістің 80 жылдығына орай өтетін әскери шерудің тікелей көрсетілімін AlmatyTV телеарнасынан көре аласыз.

Оқи отырыңыз: Астанада 7 мамырда өтетін әскери шеру: нені ескеру керек