Өгей қызын ұрып, шашынан сүйреген: Маңғыстауда ер адамға қылмыстық іс қозғалды

Маңғыстау тұрғыны кәмелет жасына толмаған қызды өгей әкесі жұрттың көзінше ұрып-соққан. Бұл туралы кәмелетке толмағандардың істері жөніндегі облыстық комиссияның мүшесі Диляра Турина мәлімдеді, деп хабарлайды Аlmaty.tv тілшісі Kazinform-ға сілтеме жасап.

Д. Туринаның айтуынша, ер адам әйелі мен оның 16 жастағы қызына үнемі психологиялық қысым көрсетіп келген. Ал оқиға болатын күні үйге кіре алмаған соң, оларды сыртта аңдыған. Жасөспірім қыз дүкенге нан алуға шыққанда, оны өгей әкесі үйдің кіреберісінен ұстап алған. Қызды шашынан сүйреп, көпшіліктің көзінше соққыға жыққан. 

– Өкінішке қарай, сол кезде куәгерлердің ешқайсы қызға араша түспеген. Жасөспірім қазір ауруханаға жатқызылды. Анасы полицияға арыз түсірді. Бұл дерек бойынша ҚР Қылмыстық Кодекстің 109-бабы – «Денсаулыққа қасақана жеңіл зиян келтіру» бойынша қылмыстық іс қозғалды. Іс Маңғыстау облыстық полиция департаментінің, кәмелетке толмағандардың істері жөніндегі комиссияның және облыстық прокуратураның бақылауына алынды, - дейді Диляра Турина.

Жәбірленушіге кәмелетке толмағандарға қолдау көрсету орталығының психологы психологиялық көмек көрсетеді. Диляра Турина тұрғындарды мұндай оқиғаларға бейжай қарамауға шақырды.

– Баланы, қызды, әйелді ұруға ешкімнің құқығы жоқ. Мұндай жағдайлар қоғамда кең резонанс тудырып, әрбір азамат бала мен әйелдің құқығын қорғауға жұмылуы тиіс, - дейді ол. 

Оқи отырыңыз: Қараусыз ғимаратта жатқан: ШҚО-да жоғалған жасөспірім табылды