Таяу Шығыс елдерінен қазақстандықтарды эвакуациялауға қатысушыларға мемлекеттік наградалар табыс етілді

Бүгін Таяу Шығыс өңірінде әуе кеңістігінің жабылуына байланысты биылғы ақпан айында эвакуациялық іс-шаралар ұйымдастыруға және өткізуге елеулі үлес қосқан авиация саласының өкілдерін марапаттау рәсімі өтті, - деп хабарлайды Almaty.tv. Үкіметтің баспасөз қызметіне сілтеме жасап.

Марапаттарға мемлекеттік органдар мен ұйымдар қызметкерлері, әуе компаниялары мен әуежайлар мамандары, ұшу экипаждарының мүшелері, жерүсті қызметтерінің мамандары және саланың басқа да өкілдері ұсынылды.

Мемлекеттік наградаларды Мемлекет басшысының атынан Қазақстан Республикасы Премьер-министрінің бірінші орынбасары Роман Скляр табыс етті.

«Барлық жұмыстың нақты әрі үйлесімді ұйымдастырылғанын атап өткім келеді. Бұл лайықты ордендер, медальдар және Президенттің алғысы сіздер үшін алдағы кәсіби өсуге, бар дағдыларды жетілдіруге және жаңа білім мен қабілеттерді меңгеруге қосымша серпін береді деп сенемін. Бұл сіздерге алдағы уақытта да Отанымыздың өркендеуі жолында жемісті еңбек етуге мүмкіндік береді», — деді Роман Скляр.

Биылғы ақпан айында Таяу Шығыс өңірінде әуе кеңістігінің жабылуына байланысты Мемлекет басшысының тапсырмасы бойынша Қазақстан азаматтарын елге қайтару бойынша ауқымды жұмыс жедел ұйымдастырылды. Құрылған ведомствоаралық топтың құрамындағы мемлекеттік органдар мен ұйымдар өкілдері тиісті жұмысты қамтамасыз етті.

3–13 наурыз аралығында 66 рейс орындалып, еліміздің 10 275 азаматы Отанына қайтарылды. Тасымалдауды отандық әуе компаниялар Дубай, Шарджа, Джидда, Медина және Маскаттан Алматы, Астана, Атырау, Ақтау және Шымкент бағыттары бойынша жүзеге асырды.

Оқи отырыңыз: Кітапхана енді қолыңызда: Алматы кітапханаларының мобильді қосымшасы іске қосылды