Педагог мәртебесін көтеру: Алматыда тың идеялар талқыланды

Оңтүстік астанада ұстаз мәртебесін көтеруге бағытталған «Инновациялық педагогикалық идеялар фестивалі» өтті, деп хабарлайды Almaty.tv.

Білім беру сапасын дамытуды мақсат еткен іс-шара Олимпиада резервінің республикалық мамандандырылған мектеп-интернат-колледжінде ұйымдастырылды. Фестиваль аясында қазақ тілі мен әдебиеті мұғалімдерінен бастап, физика, математика, жаратылыстану, тарих, құқық және дене шынықтыру пәндерінің педагогтері әдіс-тәсілін ортаға салып, жаңашыл идеясын бөлісті.

«15 мектептен келген педагогтар отыр. Өздерінің әдіс-тәсілін, идеясын фестивальде көрсетеді. Сондықтан іс-шара – педагогтар үшін және балаларымыздың ары қарай білім сапасын арттыру үшін өте қажетті, маңызды алаң болып есептеледі», – деді оқу орнының директоры Сағат Сырлыбаев.

Байқауда ұсынылған жобалар педагогикалық идеялардың өзектілігі мен білім беру жүйесіне ықпалы тұрғысынан бағаланды. Қатысушылар жұмысын таныстырып, кәсіби шеберлігін көрсетуге мүмкіндік алды. Қатысушылардың айтуынша, іс-шаралар білім беру саласын жаңғыртуға ғана емес, педагог мәртебесін арттыруға да үлес қосады.

 «Менің мақсатым – физиканы тереңдете оқытып, балаларға жаңашыл программаларды, жаңашыл порталдарды, физиканы тереңірек ұғындырып, жаңа бағдарламаларды ұсынамын», – деді оқу орнының физика пәні мұғалімі Бағлан Беделбаева.

Оқи отырыңыз: Жас зерттеушілер: елімізде оқушылардың академиясы құрылады