«Әділдік алаңы» бағдарламасы: жас маманның алғашқы қадамы — жұмысқа орналасу жолдары

Almaty TV телеарнасы еңбек нарығындағы өзекті мәселелер мен жас мамандарды қолдауға бағытталған мемлекеттік шараларға арналған «Әділдік алаңы» бағдарламасының жаңа шығарылымын ұсынады.

Алматы — еліміздегі еңбек нарығы шоғырланған ең ірі орталық. Жыл сайын мыңдаған жас еліміздің оқу орындарын тәмамдап, жұмыс іздеуге кіріседі. Дегенмен, кәсіби жолын жаңадан бастаған түлектер үшін басты кедергілердің бірі — жұмыс тәжірибесінің талап етілуі. Жастардың алған теориялық біліміне қарамастан, жұмыс берушілер көбіне іс-тәжірибесі бар, дайын мамандарды іздейді.

Ағымдағы жылдың бірінші тоқсанындағы ресми статистикаға сәйкес, Қазақстанда 15 жастан асқан халықтың жұмыспен қамтылу деңгейі 64,1%-ды құрады. Жұмыс күшіне араласу деңгейі 95,5%-ға жетсе, жұмыссыздық деңгейі 4,5% көрсеткішінде тұрақтады. Жыл сайын еліміздің еңбек нарығына 150 мыңнан астам түлек қосылады. Тек Алматының өзінде жыл сайын оқу орындарын 50–60 мың студент бітіріп шығады. Жауапты тұлғалардың айтуынша, олардың шамамен 70–80%-ы оқуын аяқтаған бойда жұмыс табады.

Сарапшылардың атап өтуінше, бүгінде мемлекет жұмысқа орналасқысы келетін азаматтарға қолдау көрсету мақсатында бірқатар мемлекеттік бағдарламаларды ұсынып отыр. Қазіргі таңда «Жастар практикасы», «Алғашқы жұмыс орны», «Күміс жас» және «Бастау Бизнес» жобаларының арқасында мыңдаған азамат жұмыспен қамтылды. Тек 2026 жылдың басынан бері Алматыдағы Еңбекке үйлестіру орталығына 22 мыңнан астам адам жүгінген.

«Жұмыссыз азаматтар мансап орталығына хабарласып, еңбек нарығында сұранысқа ие мамандықтар бойынша кәсіптік білім ала алады. Оқыту жұмыс берушілердің базасында да, білім беру ұйымдарында да жүргізіледі. Оқу мерзімі алты айға дейін. Азаматтар еңбек нарығында жоғары сұранысқа ие мамандықтар бойынша дайындықтан өте алады», — деді мансап орталығының директоры Алтынай Жөкенова.

Мамандардың пайымдауынша, бүгінде жұмысқа орналасу мүмкіндіктері жеткілікті. Тіпті кадр тапшылығын қатты сезініп отырған салалар да бар. Алайда, мамандардың жетіспеушілігіне басты себептің бірі — жастардың жаппай белгілі бір мамандықтарға ғана ұмтылуы. Мамандық таңдауда олар өз қабілеттері мен таңдалған кәсіптің сәйкестігін ескере бермей, көбіне оның беделі (престижі) мен болашақтағы табыс деңгейіне басымдық береді. Сарапшылар бұл мәселені шешу үшін жастар арасында ерте кәсіптік бағдар беру жүйесін күшейту қажет деп есептейді.

Оқи отырыңыз: «Әділдік алаңы»: ауқымды реформадан кейін МӘМС қалай жұмыс істеп жатыр