Петропавлда терезеден құлаған 5 жастағы бала ауруханада жатыр

Петропавлда бес жастағы бала жоғарыдан құлап, опат бола жаздады. Оқиға қонақ үйде болған, деп хабарлайды Almaty.tv тілшісі.

Бүлдіршін қазір дәрігерлердің бақылауында. Оған бас-ми жарақаты диагнозы қойылған. Одан бөлек денесінің бірнеше жерінен соққы алған. Құқық қорғау органдары қазір жағдайдың мән-жайын анықтап жатыр. Баланың ашық терезеге қалай барғаны әзірге белгісіз.

Айта кетейік, бұл – биыл Солтүстік Қазақстан облысында тіркелген оныншы жағдай.

«Балаға бас-ми жарақаты диагнозы қойылды. Сонымен қатар оң жақ жамбасынан, балтырынан және табанынан соғылған жарақаттар мен гематомалар бар. Қазір бала төсек режимін сақтауда. Ем-домды бекітілген хаттамаға сәйкес алып жатыр. Әзірге хирургиялық араласу қажет болған жоқ. Алайда жағдайына байланысты қажеттілік туындаса, тиісті ота жасалады», – деді облыстық Денсаулық сақтау басқармасының баспасөз хатшысы Гүлнәр Қалиева.

Оқи отырыңыз: Астанада ұшақ бортында жанжал шығарған мас жолаушы 10 тәулікке қамалды