Ұлы Жібек жолының ізімен: туристік пойыз алғаш рет Орталық Азиядағы үш елді біріктіреді

2026 жылдың 20–25 наурыз аралығында халықаралық «Jibek Joly» туристік пойызы біртұтас мәдени-танымдық бағыт аясында Қазақстан, Өзбекстан және Тәжікстанды біріктіреді. Жоба аясында алғаш рет туристік бағыт Душанбе қаласына дейін ұзартылды, - деп хабарлайды Almaty.tv. ҚТЖ-ның баспасөз қызметіне сілтеме жасап.

Ұлы Жібек жолының тарихи қалалары арқылы өтетін бұл бағыт Алматыдан басталып, Түркістан, Самарқан, Душанбе және Ташкентті қамти отырып, Орталық Азияның рухани және заманауи орталықтарын байланыстырады. Туристік пакеттің бағасына туристік пойызбен қатынау, кәсіби гидтердің қатысуымен әзірленген экскурсиялық бағдарлама, кіріс билеттері, сондай-ақ трансфер қызметтері қамтылған.

Жобаның ерекше маңыздылығы оның Наурыз мейрамы мен қасиетті Рамазан айының аяқталуымен тұспа-тұс келуімен айқындалады. Сапар барысында қатысушылар Орталық Азия халықтарының мерекелік дәстүрлері, ұлттық салт-санасы, музыкасы мен әдет-ғұрыптарымен кеңінен танысу мүмкіндігіне ие болады.

 «Jibek Joly» туристік пойызының іске қосылуы теміржол туризмін дамытудағы маңызды кезең болып, Қазақстан, Өзбекстан және Тәжікстан арасындағы мәдени ықпалдастықты күшейтуге, сондай-ақ өңірдің бай тарихи мұрасын кеңінен дәріптеуге серпін береді.

Оқи отырыңыз: Үкімет Алматы, Маңғыстау және Бурабайда инфрақұрылымды кешенді дамытуды қамтамасыз етеді