Рамазанға 20 күн қалды: Жұмада қандай амалдар қабыл болады

Мұсылман жұманы қасиетті деп біледі. Көпшілік таңмен таласа тұрып, жеті нан пісіріп, көршілерге таратады. Сондай-ақ мешітке барып, ата-баба рухына құран бағыштап, садақа беріп жатады. Неліктен?
Almaty.tv тілшісі жұманың қасиетін талдап көрді.

Жұма - мұсылман үшін ең қасиетті күн
Жұма - ислам дінінде ерекше мәнге ие күн. Бұл күні мұсылмандар мешітке жиналып, жұма намазын оқиды, дұға жасап, рухани тазаруға ұмтылады. Қасиетті Құран мен хадистерде жұма күнінің ерекшелігі жазылған.

«Ей, иман келтіргендер! Жұма күні намазға азан шақырылған кезде Алланы еске алуға асығыңдар да, сауда-саттықты тоқтатыңдар», делінген «Жұма» сүресі, 9-аятта.

Ислам деректеріне сүйенсек, жұма күні адамзат тарихындағы маңызды оқиғалар болған. Адам ата (а.с.) осы күні жаратылған, жұмаққа кіргізілген және жерге түсірілген. Сондай-ақ қиямет күні де жұмаға сәйкес келетіні хадистерде айтылады.

Жұма намазы - мұсылман ер адамдарға парыз ғибадат.

Бұл - тек діни рәсім ғана емес, қоғамдағы бірлік пен рухани тәрбиені нығайтатын маңызды институт. Құтпа барысында имандылық, адамгершілік, әділет, жауапкершілік сияқты құндылықтар насихатталады.

Жұма күні қандай амалдар жасалады?
Бұл күні орындалатын бірқатар сауапты амалдар бар:

• ғұсыл алу, таза киім кию;
• мешітке ерте бару;
• Құран оқу, әсіресе «Кәһф» сүресін оқу;
• Пайғамбар Мұхаммед с.ғ.у салауат айту;
• кешірім сұрап, тәубе ету;
• дұға жасау.

Ғалымдардың пікірінше, жұма күні - адамның рухани жаңғыруына, қоғамдағы ынтымақ пен бауырмалдықтың нығаюына ықпал ететін ерекше уақыт.
Оқи отырыныз: Рамазанға 21 күн қалды: қалай жаңа әдет қалыптастыруға болады