Рамазанға 22 күн қалды: cауап жасау үшін бай болу міндетті емес

Кейде адамдар сауапты тек қаржылай көмекпен немесе үлкен қайырымдылықпен байланыстырады. Алайда ислам танымында сауап ұғымы әлдеқайда кең, деп хабарлайды Almaty.tv.

Дін мамандарының айтуынша, адамға пайда әкелетін кез келген ізгі іс – сауап. Бұл үшін міндетті түрде көп қаражат қажет емес, бастысы – ниет пен әрекет.

Ислам дереккөздерінде қарапайым әрекеттердің өзі игілік ретінде бағаланатыны айтылады.

Пайғамбарымыз Мұхаммед (с.а.у.) адамдарға жылы жүз танытудың маңызын атап өткен. Хадистерде "біреуге күлімсіреп қарау – садақа" екені жазылған.

Ислам ілімінде сауапқа жеткізетін амалдардың қатары көп:

• жылы сөз айту, көңіл жұбату;
• әлсізге жәрдем беру, қол ұшын созу;
• жолдағы қауіпті затты алып тастау;
• біреуге бағыт көрсету, көмектесу;
• әділдік таныту;
• ата-анаға құрметтеу;
• табиғатқа жанашыр болу.

Бұл әрекеттің барлығы қоғамдағы адамгершілік құндылықтарды нығайтуға ықпал етеді.

 «Кім бір тозаңдай жақсылық жасаса, соны көреді», делінген Зілзала сүресі, 7-аятта.

Демек жақсылық елеусіз қалмайды. Сауаптың тек үлкен істермен емес, ұсақ амалдармен де өлшенетінін көрсетеді.

Сарапшылардың пікірінше, сауапты тек материалдық көмекпен шектеу дұрыс емес. Қарапайым адамгершілік әрекеттерді дәріптеу қоғамда мейірім, сенім және жауапкершілік мәдениетін қалыптастырады.

Осы тұрғыдан алғанда, сауап ұғымы – тек діни түсінік емес, әлеуметтік мәні бар құндылық. Ол адамдар арасындағы сыйластық пен бірлікті арттыруға ықпал етеді.

Сауап жасау үшін бай болу міндетті емес. Әр адам күнделікті өмірде қарапайым жақсылық жасау арқылы рухани пайдаға қол жеткізе алады.

Жақыныңа күлімсіреу, жылы сөз айту – үлкен игілікке жол ашатынын ұмытпаңыз.

Оқи отырыңыз: Рамазанға 23 қалды: ұлттық код – рухани иммунитеттің негізгі тірегі