СҚО-да мүгедектігі бар жұмысшылардан жеке табыс салығын ұстау деректері анықталды

Солтүстік Қазақстан облысының прокурорлары мүгедектігі бар тұлғалардың конституциялық құқықтарын қорғады, деп хабарлайды Almaty.tv облыстық прокуратураның баспасөз қызметіне сілтеме жасап. 

Қадағалау органы талдау барысында жеке табыс салығын негізсіз ұстаудан көрінетін салық заңнамасын өрескел бұзушылықтарды анықтады.   

"Мәселен, 2023-2024 жылдары Ақжар, Есіл, Ғ.Мүсірепов, Мамлют, Шал ақын, Тайынша аудандарының жұмыс берушілері «Салық кодексінің және бюджетке төленетін басқа да міндетті төлемдер туралы» талаптарына қайшы, мүгедектігі бар 366 жұмысшыдан жалпы сомасы 16,9 млн теңге жеке табыс  салығын ұстап қалған, ал соңғылары Салық кодексіне сәйкес оларды төлеуден босатылған", - делінген хабарламада.  

Есіл ауданында білім бөлімінің лауазымды тұлғалары жалпы сомасы 1,7 млн теңгеге мүмкіндігі шектеулі балалардың 24 заңды өкілінен жеке табыс салығын негізсіз ұстаған.  

Прокурорлық қадағалау актілері бойынша жоғарыда аталған тұлғаларға мемлекеттік кіріс органдары 6,2 млн теңгені қайтаруды қамтамасыз етіп, кінәлілерді заңда белгіленген жауапкершілікке тарту шараларын қабылдауда.  

Қалған соманы қайтару бойынша жұмыс жалғасуда.   Халықтың әлеуметтік осал топтарының құқықтарын сақтау мәселелері облыс прокуратурасының бақылауына алынды.

Оқи отырыңыз: Алматының Алатау ауданында “Таза Қазақстан” акциясы өтті