Түркістан облысында тауға шықпақ болған 6 туристке құтқарушылар көмек көрсетті

Түркістан облысында тауға шығып қайта оралмаған 6 туристі ТЖМ құтқарушылары құтқарды, деп хабарлайды Аlmaty.tv.

Төтенше жағдайлар министрлігінен хабарлағандай, құтқарушылар таулы аймақта 4 шақырым, өзен бойымен 1 шақырым жүріп өткен.

«Кеше Шымкент қаласының тұрғындары — үшеуі ер, үшеуі әйел — Түркістан облысы, Бәйдібек ауданындағы «Үлкен Тұра» шыңын бағындыруға аттанған болатын. Алайда олар белгіленген уақытта оралмаған. Байланыс үзілген, ал уақыт өтіп жатты. Туыстарының бірі құтқарушылардан көмек сұраған», - делінген ТЖМ хабарламасында.

Құтқарушылар «Сырдария–Түркістан» өңірлік табиғи паркінің аумағына аттанып, 5 шақырымға жуық қиын таулы жермен, соның ішінде 1 шақырым — таулы өзеннің бойымен жүріп өтті.

Топ түнгі уақытқа қарай таудан табылды. Белгілі болғандай, әйелдердің бірі аяғын сындырып алған, ал қалғандары оны өз күштерімен тасымалдай алмаған.

Оқи отырыңыз: Бестеректегі жол апаты: зардап шеккен қыз бала Семейге жеткізілді