Алматыда «Алматының қызыл алмасы – берік әрі бақытты отбасының символы» инклюзивті фестивалі өтті

Қазақстандағы Отбасы күнінде Алматы қаласы Оқушылардың инновациялық шығармашылық орталығында «Алматының қызыл алмасы – берік әрі бақытты отбасының символы» атты инклюзивті қайырымдылық фестивалі өтті, деп хабарлайды Almaty.tv.

Іс-шараны Алматы қаласы Білім басқармасының қолдауымен Қазақстан және Орталық Азия Отбасы институты мен Қазақстан гемофилия қауымдастығы ұйымдастырды. Жобаның бастамашысы әрі идеялық демеушісі, Қазақстан және Орталық Азия Отбасы институтының президенті Эльмира Әлиева бұл шараларды 2011 жылдан бері өткізіп келеді. Ол әрбір бала өзін тең әрі маңызды сезінетін табиғи инклюзия кеңістігін қалыптастырып отыр.

15 жылдық жұмысы ішінде фестиваль ерекше білім беру қажеттіліктері бар және ауыр дертке шалдыққан балаларды әлеуметтендірудің, шығармашылық тұрғыдан өзін-өзі жүзеге асырудың және бейімдеудің маңызды алаңына айналды. Жобаның басты тұжырымдамалық ерекшелігі — еліміздің түрлі қалаларынан келген ерекше балалар мен Алматының балалар шығармашылық ұжымдарындағы өнерпаздарды бір сахнада тоғыстыру. Биыл 13 негізгі қатысушымен бірге сахнаға 100-ден астам жас биші шығып, шынайы достық пен өзара қолдаудың үлгісін көрсетті.

Биылғы мереке «"Алматының қызыл алмасының" жаңа ертегісін балалар жазады!» ұранымен жаңа форматта өтті. Әрбір қатысушы өзінің сүйікті ертегі кейіпкерін таңдап, сценаристер мен видеографтар тобы оларды сенімділік пен отбасылық құндылықтар туралы біртұтас театрландырылған қойылымға біріктірді. Толқынысты жеңіп, үлкен аудитория алдына шыққан балалар өз бойындағы сенімділікті арттырып, дарындарын шыңдай түсті.

Ұйымдастырушылар бұл жоба ата-аналар мен балаларға қоғамның толыққанды мүшесі екенін сезіндіріп, үлкен психологиялық қолдау беретінін атап өтті. Осыған байланысты «Гемофилиямен ауыратын майыптардың Қазақстандық Ассоциациясы» Қоғамдық бірлестігінің президенті Ақжан Ерікқызы бұл тәжірибені кеңейтіп, еліміздің барлық өңірлерінде «Жаңарған Қазақстан – данышпан әрі саналы отбасының символы» концепциясы аясында осындай инклюзивті фестивалдар өткізу бастамасын көтерді.