Қазақстанда университеттердің цифрлық ұлттық рейтингі енгізіледі

Қазақстанда жоғары оқу орындарының қызметін бағалаудың негізгі құралына айналатын университеттердің цифрлық ұлттық рейтингі енгізіледі. Бұл туралы Мәжілістегі үкімет сағатында Ғылым және жоғары білім министрі Саясат Нұрбек мәлімдеді, деп хабарлайды Almaty.tv Informburo.kz сайтына сілтеме жасап.

Жаңа жүйе ағымдағы жылы іске қосылады және жоғары оқу орындарын қаржыландырудың жаңартылған моделіне негізделеді. Министрдің айтуынша, рейтинг мемлекеттік білім беру тапсырысын бөлу кезінде ашықтық пен объективтілікті қамтамасыз етеді, бұл өз кезегінде қаражатты ең тиімді жұмыс істейтін жоғары оқу орындарына бағыттауға мүмкіндік береді.

Сонымен қатар, министрлік академиялық ортаны жаңғырту бойынша жұмыстар жүргізуде. Бұған дейін Саясат Нұрбек қазақстандық жоғары оқу орындарындағы антиплагиат жүйелерін жаңарту жоспары туралы айтқан болатын. Бұл жаңашылдықтың мақсаты – нейрожелілердің көмегімен жазылған курстық және диссертациялық жұмыстарды анықтау, бұл студенттік зерттеулердің сапасы мен дербестігін арттыруға септігін тигізеді.