Жаңатас қаласы жарық пен жылусыз қалды

Жамбыл облысының кей аумағында қатты боран соғып, салдарынан "Шахан" жылу тарату станциясы істен шықты, деп хабарлады Almaty.tv тілшісі облыс әкімдігінің баспасөз қызметіне сілтеме жасап.

Желдің екпіні секундына 30 метрге жеткен. Бораннан Жаңатаста шамамен 20 электр бағанасы құлап, қала жылу мен жарықсыз қалды.

Электр желілерін қалпына келтіру үшін Тараз қаласынан арнайы бригада жұмылдырылды.

Қаратау қаласында да қалпына келтіру жұмыстары басталды.

Айта кетері, бораннан Қаратау қаласында 8 көпқабатты үй мен "Игілік" КМК және қалалық әкімдік ғимаратының шатыры қираған болатын. Қалпына келтіру үшін 6 мердігер компания жұмыс істеп жатыр. Тағы 6 компаниямен келіссөз жүргізіледі.

"Қазіргі кезде аудандық электр жүйесі мемемесінің 21 адамнан және 7 техникадан құралған 4 бригадасы Қаратау қаласы бойынша электр желілерін қалпына келтіріп жатыр. Көпқабатты және жеке үйлердегі электр желілері де реттелуде",- деп мәлімдеді Жамбыл облысы әкімінің баспасөз қызметі.

Әкімдіктің айтуынша, "Игілік" орталықтандырылған жылыту қазандығы штаттық режимде жұмыс істеп тұр.

4 қаңтар түнгі сағат 03:00-дегі ақпарат бойынша, қатты дауылдан 7 ғимарат зардап шекті.

"Сарысу ауданында орталық аурухана 4 генераторға қосылған. Ауыр науқастар жоқ. Қазіргі уақытта стационарда 40-қа жуық адам ем алып жатыр. Стационардағы балалар жақын маңдағы автономды жылыту амбулаториясына ауыстырылды",- дейді әкімдік.

Жүкті әйелдерге арналған перзентханада жылытуға арналған арнайы құрылғылар қосылған.

Жағдай тұрақталғаннан кейін қысқа мерзімде электр желілерін қалпына келтіру жұмыстары жүргізіледі.

"Шахан" қосалқы станциясына барған Нұржан Нұржігітов қаланы ең алдымен электр энергиясына қосу керектігін жеткізді.

Қазіргі кезде электр желілерін реттеу жұмыстарына 10 бригада жұмылдырылған.

Аймақ басшысы бұл жұмыстарды 2-3 сағатта аяқтауды тапсырды.