Синоптиктер: Алматыда алдағы апта күн +35 градусқа дейін ысиды

Алдағы апта Алматыда ауа температурасы көтеріледі. Ал, келесі айда қала тұрғындары шілденің шіліңгір ыстығын сезінеді дейді синоптиктер.

Алдағы демалыс күндері Алматы қаласында және қала аумағында өткінші жауын-шашын күтіледі, найзағай жарқылдауы мүмкін. Желдің жылдамдығы 12 м/с дейін күшейеді.

«Келесі аптада қалада ауа райы тұрақты болады деп күтілуде. Түнде 20-25 градусқа дейін нөлден жоғары болса, күндіз 35 градусқа дейін ысиды. Ал, таулы аймақтарда ауа температурасы қалаға қарағанда 3-5 градусқа дейін төмен болуы мүмкін», - дейді «Қазгидромет» РМК Алматы қаласы бойынша филиалының инженер-синоптигі Гүлтаңсық МЕДЕУОВА.

Ауа райын болжаушылар шілденің алматылықтар үшін ерекше ыстық болатынын айтып отыр.

«Биыл Алматыда шілде аптап ыстықтығымен ерекшеленуі мүмкін. Түнгі уақытта термометр бағаны +25 градусқа дейін көтерілсе, күндіз 38 градусқа дейін ыстық болуы ықтимал. Кей күндері өткінші жауын жауады», - деді Гүлтаңсық МЕДЕУОВА.