Меншікті өндіріс
Біз әлеуметтік желілердеміз
Мемлекет басшысы: Коронавирус індетімен күрес әлі аяқталған жоқ
Бүгін Ұлттық қоғамдық сенім кеңесінің 3-ші отырысы өтіп жатыр
Ұлттық қоғамдық сенім кеңесінің 3-отырысында ҚР Президенті Қасым-Жомарт Тоқаев еліміз пандемияның шарықтау шегінен өткенімен, індетпен күрес әлі аяқталмағанын айтты, деп хабарлайды Almaty.tv.
«Біз бүгін ерекше жағдайда кездесіп отырмыз. Коронавирус індеті жұмыс тәртібімізге елеулі өзгеріс енгізді. Қазіргі таңда еліміз пандемияның шарықтау шегінен өтті. Бірақ, індетпен күрес әлі аяқталған жоқ. Бұл індет - өте қауіпті. Батпандап кіреді, мысқалдап шығады. Коронавирус қазіргі әлемнің құндылықтарын айтарлықтай өзгертті», - деді Қасым-жомарт Тоқаев.
ҚР Президенті денсаулық сақтау жүйесінің, өзін-өзі қамтудың, ынтымақтасу мен жауапкершіліктің маңызы арта түскенін баса айтты.
«Соған сәйкес мемлекет қызметінде және қоғамдық өмірдің барлық саласында түбегейлі өзгерістер болмақ. Пандемия біздің еліміз үшін де үлкен сынақ болып отыр. Қазақстан халқы ешқашан қиындыққа мойыған емес. Бұл жолы да бірлігіміздің бекем екендігін көрсеттік. Біз ырыс пен ынтымақтың арқасында кез келген сынақты абыроймен еңсереміз деп сенемін», - деді Мемлекет басшысы.
Айта кетсек, бүгін ҚР Президенті Қасым-Жомарт Тоқаевтың төрағалығымен Ұлттық қоғамдық сенім кеңесінің үшінші отырысы өтіп жатыр. Кезекті отырыс адами капиталды дамытуға, атап айтқанда, білім беру, денсаулық сақтау мәселелеріне арналған.