Президенттің атына Құрбан айт мерекесіне байланысты құттықтаулар келіп түсті

Мемлекет басшысы Қасым-Жомарт Тоқаевтың атына Құрбан айт мерекесіне орай шет мемлекеттердің Президенттері мен халықаралық ұйымдардың басшыларынан құттықтау хаттары мен жеделхаттары келіп түсуде, деп хабарлайды Almaty.tv тілшісі Ақорданың ресми сайтына сілтеме жасап.

Өзбекстан Президенті Шавкат Мирзиёев өзінің құттықтауында Қасым-Жомарт Тоқаевтың екі ел арасындағы достық пен бауырластықты, сауда-экономикалық, әлеуметтік, рухани-ағартушылық бағыттағы қатынастарды, сондай-ақ, халықтарымыздың ортақ сын-қатерлерге қарсы күрестегі ынтымақтастығын жан-жақты нығайтуға зор үлес қосқанын атап өткен.

Қырғызстан Президенті Сооронбай Жээнбеков екі ел халқының мүддесі үшін Қырғызстан мен Қазақстан арасындағы стратегиялық серіктестік, достық, одақтастық және тату көршілік байланыстар Қасым-Жомарт Тоқаевтың тікелей қолдауымен одан әрі нығая түсетініне сенім білдірді.

Тәжікстан Президенті Эмомали Рахмон Қасым-Жомарт Тоқаевпен бірлесе отырып, Тәжікстан мен Қазақстан арасындағы тығыз ынтымақтастықты нығайтуға және кеңейтуге бағытталған өзара ықпалдастықты жан-жақты ілгерілетуге ниетті екенін жеткізген.

Түрікменстан Президенті Гурбангулы Бердімұхамедов Қасым-Жомарт Тоқаевқа зор денсаулық, бақыт және оның қолға алған барлық бастамалары мен игі істеріне табыс, ал бауырлас Қазақстан халқына бақ-береке тіледі. Түркия Президенті Режеп Тайип Ердоған өзінің құттықтау хатында «Жеке өзімнің және халқымның атынан Құрбан айт мерекесімен шын жүректен құттықтаймын. Қазір бастан кешіріп жатқан қиын-қыстау кезеңде бізді біріктіретін осы қасиетті мерекеде Сізге зор денсаулық, бақыт, ал бауырлас Қазақстан халқына бейбітшілік, бақ-береке тілеймін», – деп жазған.

Мемлекет басшысын Құрбан айт мерекесіне орай құттықтап, жылы лебіз білдірген құттықтау жеделхаттарын Әзербайжан Президенті Ильхам Әлиев, Иран Президенті Хасан Рухани, Египет Президенті Абдель Фаттах Ас-Сиси, Иордания Королі II Абдалла, Бахрейн Королі Шейх Хамад бен Иса Әл-Халифа, Оман Сұлтаны Хайсам бен Тариқ, Марокко Королі VI Мұхаммед, Алжир Президенті Абдельмаджид Теббун, Ауғанстан Президенті Ашраф Ғани, Палестина басшысы Махмуд Аббас пен Филиппин көшбасшысы Родриго Дутерте, сондай-ақ, Ислам ынтымақтастығы ұйымының Бас хатшысы Юсеф бен Ахмад Әл-Осеймин, ИСЕСКО-ның Бас директоры Салим М.Әл-Малик, Кавказ Мұсылмандары Басқармасының төрағасы, ТМД Дінаралық кеңесінің теңтөрағасы, шейх-уль-ислам Аллахшүкір Паша-заде жолдады.