Ерлан Қарин АЭС салу жөніндегі референдумға дайындықтың қорытындысын айтты

Мемлекеттік кеңесші Ерлан Қарин Қазақстанда Атом электр стансасын салу мәселесіне қатысты референдум аясында тура 400 күнге созылған ақпараттық-түсіндіру жұмысының қорытындысы туралы айтты, деп хабарлайды Аlmaty.tv.

Оның айтуынша, бұл жұмысты Қазақстанның саяси тарихындағы ең ұзақ науқан деуге толық негіз бар.

"Неге 400 күн? Себебі Мемлекет басшысы референдум өткізу туралы идеясын былтыр, яғни 2023 жылғы 1 қыркүйекте кезекті Жолдауында айтты. Дәл сол күні референдумға қатысты ауқымды жұмыс басталды деуге болады", - деп жазды Ерлан Қарин әлеуметтік желідегі парақшасында.

Осы уақыт ішінде әр аймақта қоғамдық тыңдау ұйымдастырылды, ақпарат кеңістігінде сарапшылар мен қоғам белсенділері жан-жақты пікір алмасты.

"Жалпы, осы науқан байсалды түрде, өзара түсіністік жағдайында өтті. Рефендум кезінде еліміздегі қоғамдық күштер алғаш рет саяси емес, экономикалық мүдде тұрғысынан күш-жігерін біріктіргенін атап өткен жөн. "Amanat" партиясының бастамасымен 6 саяси партия және 20-дан астам қоғамдық бірлестік Атом электр стансасын салуды қолдау жөніндегі халықтық штаб құрды. Штаб мүшелері барлық өңірдің тұрғындарымен кездесу өткізді, оған энергетика саласының жетекші сарапшылары мен мамандары қатысты", - деді ол.

Осылайша, азаматтарымыздың Қазақстанда атом энергетикасын дамытуға қатысты байыпты тоқтамға келуіне мүмкіндік берілді.

Оқи отырыңыз: АЭС: елімізде электр қуатын тұтыну көрсеткіші жоғары