Мемлекет басшысы Қазақстан-Бавария технологиялық форумының ашылуында сөз сөйледі

Қазақстан Президентінің ГФР-ға ресми сапарының бағдарламасы Мюнхенде өткен, бизнес, өнеркәсіп және технология көшбасшыларының басын қосқан Қазақстан-Бавария технологиялық форумына қатысумен қорытындыланды, деп хабарлайды Almaty.tv тілшісі Ақордаға сілтеме жасап.

Іс-шара қатысушылары алдында сөйлеген сөзінде Қасым-Жомарт Тоқаев Баварияны Еуропадағы жетекші өнеркәсіптік аймақ, сондай-ақ инженерия мен жоғары технологиялардың әлем таныған орталығы деп атады. Президент Қазақстан азаматтары үшін «Германияда жасалған» белгісі әрдайым сапа мен сенімділіктің синонимі болып келгенін атап өтіп, озық технологиялар мен жаңа нарықтарға бірлесе шығу есебінен экономикалық қарым-қатынастарды жаңа деңгейге көтеруге дайын екенін білдірді.

Мемлекет басшысы Қазақстанда Siemens, Siemens Energy, Knauf, Horsch сияқты Баварияның жетекші компаниялары табысты жұмыс істеп жатқанын еске салды. Инвесторларды одан әрі тарту үшін елде тиісті жағдайлар, соның ішінде Үкімет жанындағы Инвестициялық штаб пен АХҚО жұмысы үздіксіз жетілдіріліп келеді.

Президент өзара тиімді серіктестіктің негізгі бағыттарын айқындап берді:

• Озық өндіріс және автоматтандыру: Қазақстан машина жасау, металлургия және электротехника салаларындағы қуатын арттырып келеді. Мемлекет басшысы өнеркәсіпті автоматтандыру саласындағы әлемдік көшбасшылардың (Siemens, KUKA) мүмкіндіктерін отандық ірі кәсіпорындармен (соның ішінде Qarmet) біріктіруді ұсынды. Ынтымақтастық формуласы — «Қазақстанда Бавария технологиясымен және неміс сапасымен өндірілген».
• Критикалық маңызы бар материалдар жеткізу: Қазақстан неміс өнеркәсібі үшін мыс, титан, алюминий, бериллий, тантал және ниобийдің сенімді әрі ұзақ мерзімді жеткізушісі болуға дайын.
• Микроэлектроника және жартылай өткізгіштер: Президент күштік электроника, датчиктер мен басқару жүйелері саласында отандық компаниялар мен ҒЗИ-ды бавариялық экосистемамен (Infineon Technologies, Siltronic, Rohde & Schwarz) байланыстыратын Bavarian Chips Alliance қатысуымен арнайы серіктестік бағдарламасын іске қосуды ұсынды.
• Көлік және логистика: Транскаспий халықаралық көлік бағыты (ТХКБ) бойында өнеркәсіптік және логистикалық хабтарды бірлесе дамыту.
• Агроөнеркәсіптік кешен: Нақты егіншілік пен ауыл шаруашылығы машинасын жасау технологияларын қолдана отырып, еуропалық стандарттарға сай жоғары сапалы аграрлық өнім өндіру және өңдеу бойынша қазақстандық-бавариялық үлгілі шаруашылықтар жобасын іске қосу.
• Alatau City жобасы: Бавария компанияларының инженерлік және сервистік бөлімшелерін орналастыру, өз шешімдерін таныстыру және инвестициялық жобаларды жүзеге асыру үшін бірегей алаң ретінде ұсынылды.
• Кадрлар даярлау: Қазақстан дуальды кәсіптік білім беру жүйесін енгізу бойынша Бавария тәжірибесін қабылдауға және бавариялық компаниялардың елдегі ірі өнеркәсіптік жобаларына инженерлік құзыреттерді дамытуды біріктіруге мүдделі.

Сөзінің соңында Қасым-Жомарт Тоқаев Қазақстанда да, бүкіл Орталық Азияда да неміс кәсіпорындарының мүддесін ілгерілету үшін Алматыда Бавария экономикасының өкілдігін ашуды ұсынды.