Таза Қазақстан: экологиялық акциясының аймақтарда сапалы жүзеге асуына әкімдер тікелей жауапты

«Елімізде көктемнен бері «Таза Қазақстан» жалпыұлттық экологиялық акциясы жүріп жатыр. Бұл – тұтас халықты ұйыстырған берекелі бастама» екенін атап өтті Мемлекет басшысы Қасым-Жомарт Тоқаев Қазақстан халқына Жолдауында, деп хабарлайды Almaty.tv тілшісі Ақордаға сілтеме жасап.

Президент «Таза Қазақстан» шарасына бірнеше айдың ішінде 3 миллионға жуық азамат атсалысқанын тілге тиек етті. Жүздеген мың үйдің ауласы тазартылды, 1 миллион тоннадан астам қоқыс жиналған. 

– Осындай игі шаралардың арқасында қоғамда жаңа мәдениет, жаңа қоғамдық этика орнығып келеді. Мұны туған елге деген сүйіспеншілік, жанашырлық деуге болады. Ұлттың жаңа сапасы осындай нақты шаралар арқылы қалыптасады. Бұл – уақытша науқан емес. Осы маңызды жоба жыл бойы жалғаса беруге тиіс. Себебі, шынын айтқанда, кейбір санасыз азаматтарымыз табиғатты, көшелерді әлі де ластап жатыр. Осындай адамдардың әрекетіне заң бойынша тосқауыл қою керек. Бір сөзбен, қоршаған ортаның тазалығы әркімнің күнделікті дағдысына айналуы қажет, – деді Қасым-Жомарт Тоқаев.

Мемлекет басшының айтуынша, «Таза Қазақстанның» аймақтарда сапалы жүзеге асуына әкімдер тікелей жауапты.

– Халқымыздың бойында жақсы қасиеттер өте көп. Мысалы, өзге елдер бізді қонақжай, ақкөңіл халық ретінде біледі. Дәл солай тазалық жұртымыздың қанына, жанына сіңген қасиет болуы керек. «Таза Қазақстанның» аймақтарда сапалы жүзеге асуына әкімдер тікелей жауапты. Олар жұртқа істің мән-маңызын түсіндіріп, жұмысты дұрыс үйлестіруге міндетті. Аймақ басшысы тек шаруашылықпен ғана айналыспайды. Әкім қоғамдық, рухани мәселелерді әрдайым назарда ұстауға тиіс. Әрбір басшы елмен етене жұмыс істеуі керек, тұрғындармен сенімді байланыс орнатуы қажет. Сонда жұрт та оның бастамаларын қолдайды, ел үшін пайдалы іске жұмыла кіріседі. Әкімнің абырой-беделі дегеніміз де – осы – деді Президент.

Оқи отырыңыз: Президент Үкіметке «Әлеуметтік әмиян» жобасын жүзеге асыруды тапсырды