Астанада коммуналды компанияның 4 жұмысшысы газдан уланып қайтыс болды

Нұр-Сұлтан қаласында 4 адам метан газынан уланған деп жазады ҚазАқпарат Төтенше жағдайлар комитетіне сілтеме жасап.

Оқиға елордадағы Оқушылар сарайының маңындағы құдықтардың бірінде болған. Алдын ала мәліметтерге қарағанда, уланғандардың барлығы көз жұмған. Олар бір-бірін құтқару үшін бірінің артынан бірі құдыққа түсе берген.

Жалпы, бригадада 6 адам болыпты. Олардың тағы бірі уланып, ауруханаға жеткізілген.

Қала әкімі Бақыт Сұлтановтың айтуынша, төртеуі де - «Астана су арнасы» коммуналдық мекемесінің қызметкерлері.

«Өзімнің және әкімдіктің атынан марқұмдардың отбасына қайғырып көңіл айтамын. Әкімдік барлық қажетті көмекті көрсетеді. Тиісті қызметтерге егжей-тегжейлі тергеу жүргізіп, қайғылы оқиғаның себептерін анықтауды тапсырдым», - деп жазды қала басшысы Facebook парақшасында.