Маңғыстау облысында көлік түйелерге соғылып, бір адам көз жұмды

Маңғыстау облысында көлік тасжолға шығып кеткен екі түйеге соғылып, соның салдарынан бір адам қаза тапты, деп хабарлайды Almaty.tv.  

Облыстық полиция департаментінің баспасөз қызметі мәлім еткендей, қайғылы оқиға 10 желтоқсанда Жетібай-Ақтау тасжолында болған.

«Сағат 19:00 шамасында Ақтау қаласына қарай бет алған Chery Tiggo 8 Luxury көлігінің жүргізушісі 2 түйені қағып кеткен. Оқиға салдарынан 51 жастағы әйел оқиға орнында көз жұмды. 2 зардап шегуші жақын маңдағы ауруханаға жеткізіліп, медициналық көмек көрсетілді. Дәрігерлердің зардап шеккендерді үйіне шығарғаны нақтыланды», - делінген хабарламада.

Аталған дерек Қарақиян ауданы бойынша ЕРД ОП-на 3-бөлігі бойынша тіркелді. ҚР Қылмыстық кодексінің 345-бабының 3-бөлігімен «Абайсызда адам өліміне әкеп соққан жол қозғалысы ережелерін бұзу» бойынша тіркеуге алынып, қажетті сараптамалар тағайындалды.

Қазір тергеу амалдары жүргізіліп жатыр.