Ақтауда қоныс колониясынан қашып кеткен «Шрек» ұсталды

Маңғыстау облысында жазасын өтеуден қашып жүрген ер адам ұсталды, деп хабарлайды Tengrinews.kz ҚР ІІМ ҚАЖК баспасөз қызметіне сілтеме жасап.

Ақтауда тонау қылмысы үшін сотталып, қауіпсіздік деңгейі төмен мекемеде  (ГМ-172/8, қоныс колониясы) өтеуі тиіс болған 29 жастағы ер адам ұсталды.

«Сотталған М.Бердиев «Еңбек-Ақтау» РМК-ге жұмысқа тұрған, бұл мекеме қоныс колониясының территориясынан тыс орналасқан. 2019 жылдың 4 ақпанында М.Бердиев жұмыс орнынан кетіп қалып, бақылау органдарының бақылауынан тыс жағдайды пайдаланып, жазасын өтеу мекемесіне оралмаған», - делінген хабарламада.  

10 ақпанда кешкі уақытта ГМ-172/8 қызметкерлері Ұлттық ұлан мен Маңғыстау облыстық ПД қызметкерлерімен бірге жедел-іздестіру шараларын жүргізу барысында Бердиевтің қаладағы ықшамдаудандардың бірінде ұсталғаны анықталды.

Ер адамның «Шрек» деген лақапаты бар екен. Қазіргі уақытта оған қатысты ҚР Қылмыстық кодексінің 427-бабы бойынша қылмыстық іс тергеліп жатыр. Түзету мекемесіне оралмағандар екі жылға дейін бас бостандығынан айырылады.