Атырауда екі көлік соқтығысып, бір адам көз жұмды

Атырауда екі көлік соқтығысып, жол апатынан бір адам мерт болды, деп хабарлайды Almaty.tv.

Атырау облыстық Полиция департаменті баспасөз қызметінің ақпаратына қарағанда, жол-көлік оқиғасы кеше, 22 желтоқсанда болған.

«Атырау қаласындағы З.Қабдолов көшесінің бойында Chevrolet Cobalt пен Lexus көліктері соқтығысып қалды. Жол-көлік оқиғасы Chevrolet Cobalt көлігін жүргізген жүргізушінің кінәсінен болған. Ол жолдың қарсы бағытына шығып кеткен. Соның салдарынан Сhevrolet Cobalt көлігінде отырған 50 жастағы жолаушы оқиға орнында қаза тапты», -деп хабарлады департаменттің баспасөз қызметі.

Қазір аталған жол-көлік оқиғасына байланысты ҚР Қылмыстық кодексінің 345-бабының 3-бөлігімен сотқа дейінгі тергеу амалдары жүргізіліп жатыр.

Жергілікті полиция қызметі басқармасының бастығы, полиция полковнигі Ерлан Биғамбаевтың айтуынша, биылғы жыл басынан бері облыс аумағында 326 жол-көлік оқиғасы тіркелген.

Жол апатынан 391 адам жарақат алған, 89 жолаушы көз жұмған.