Қостанай облысында зейнеткер төсегінде тірідей жанып кетті

Қостанай облысында екі пәтерлі жеке үйден өрт шығып, зейнеткер көз жұмды. Алдын ала болжам бойынша от темекіден тұтанған, деп хабарлайды Almaty.tv тілшісі Sputnik Қазақстанға сілтеме жасап.

Өрт 26 желтоқсан күні болды. Сағат 09:14-те Островное кентінің тұрғындары қоңырау шалып, екі пәтерлі жеке үйдің шатыры өртеніп жатқанын хабарлаған.

Өрт сөндірушілер оқиға орнына жеткенде, тілсіз жау қатты желден үйдің бүкіл шатырына тараған. Шатырдан бөлек, үйдің қамыстан жасалған қабырғасы да өртене бастаған. Жалын 100 шаршы метр аумақты шарпыды.

«Өрт ауыздықталғаннан кейін бөлмелердің бірінен ер адамның денесі табылды. Ол 1956 жылғы зейнеткер болып шықты. Марқұм пәтерде жалғыз тұрған. Үйдің екінші бөлігі бос және құлыптаулы болды. Алдын ала болжам бойынша өрттің шығуына зейнеткердің төсекте темекі тартуы себеп болды», – деп мәлімдеді департаменттен.

Тілсіз жауды сөндіруге жеке құрамның 9 адамы мен екі автоцистерна тартылды.