Тауға шыққан туристің жүрегі тоқтап қалды

Алматыда тауға көтерілген ер адам жүрек талмасынан қайтыс болды, деп хабарлайды Almaty.tv тілшісі қалалық Төтенше жағдайлар департаментіне сілтеме жасап.

«7 тамыз күні сағат 11:15-де «109» төтенше жағдай қызметінің құтқарушылары Медеу ауданына («Көкжайлаудан» 200 метр төмен) жүрек ұстамасы ұстап қалған 61 жастағы туристке көмек көрсету үшін шақыртуға шықты. 1740 метр биікке шығудың қиындығына қарамастан, сағат 12:30-да құтқарушылар оқиға орнына жетті. Құтқарушылар 1960 жылы туған ер адамның тыныс алмай жатқанын анықтады. Сағат 15:52-де құтқарушылар ер кісінің денесін түсіріп, полиция қызметкерлеріне тапсырды», – делінген хабарламада.

Ақпаратта айтылғандай, араға бірер сағат өткен соң тағы бірнеше адамның жоғалғаны туралы хабар жеткен.

«18:35-те ТЖД пультіне Бостандық ауданында 16-21 жас аралығындағы 4 адам, яғни қыз-келіншектердің жоғалып кеткені туралы хабарлама келіп түсті. Құрамында 5 адам және 1 техника бар құтқару қызметі олардың қайда екенін анықтады. Олар Алмаарасан шатқалыдағы жолда жоғалған адамдармен байланысқа шықты. 19:50-де құтқарушылар жоғалғандарды қарсы алып, бекетке дейін аман есен өткізіп жіберді. Жоғалған қыз-келіншектерге медициналық көмек қажет болмады», – деп хабарлайды ТЖД.

Осы орайда Алматы қаласының ТЖД туристерден таулы аймаққа шыққан кезде қауіпсіздік шараларын сақтауды сұрайды.