Алакөл маңында көлік апатынан екі адам көз жұмды

Фото: ашық дереккөзден

Тағы 28 жастағы жолаушы түрлі дене жарақатымен Үшаралдағы аудандық ауруханаға түсті

Жетісу облысындағы Алакөл ауданында көлік апатынан екі адам мерт болды, деп хабарлайды Almaty.tv тілшісі ҚазАқпаратқа сілтеме жасап.

«19 маусым күні Алакөл ауданының Ақтүбек ауылының маңында көлік апаты болды. Бескөл-Жайпақ жолының 15-шақырымында Toyota Avensis көлігінің 26 жастағы жүргізуші рөлге ие бола алмай, аударылған. Соның салдарынан көлік жүргізуші мен жолаушы мерт болды. Көлік жүргізушісі жергілікті тұрғын»,- делінген облыстық Полиция департаменті баспасөз қызметінің хабарламасында.

Ведомствоның ақпаратына сәйкес, тағы 28 жастағы жолаушы түрлі дене жарақатымен Үшаралдағы аудандық ауруханаға түскен. Аталған оқиға бойынша ҚР ҚК 345 бабы 4-бөлігі бойынша тергеу басталды.