Жамбылдағы жантүршігерлік жол апаты: жарақат алғандардың жағдайы айтылды

Дәрігерлер Тараздағы аялдамалардың бірінде болған жол апатында зардап шеккендердің жағдайы туралы айтты, деп хабарлайды Almaty.tv тілшісі Tengrinews.kz-ке сілтеме жасап.

Дәрігерлердің айтуынша, 15 қыркүйекте сағат 7.00 шамасында жедел жәрдем станциясына қоңырау түскен. Мыңбұлақ ықшамауданындағы апаттан зардап шеккендерге медициналық көмек қажет болған.

«Барлығы төрт адам жарақат алды. Олардың біреуі реанимацияға жатқызылды, қажетті ем жүргізіліп жатыр. Оған ми шайқалуы, аяғының ортаңғы үштен бір бөлігінің жабық сынуы және оң жақтағы төртінші және бесінші саусақтардың ашық сынуы, бассүйек-церебральды жабық жарақаты диагнозы қойылған. Тағы бір адамға алғашқы медициналық көмек көрсетілді. Оның басы жараланып, миы шайқалған. Оған емханада амбулаторлық ем қабылдау ұсынылды», – деді Жамбыл облысының денсаулық сақтау басқармасы өкілдері.

Бөлім мәліметінше, тағы екі әйел жедел жәрдем бригадасы келгенге дейін қаза болған. Олардың жасы шамамен 40-45 және 60-65 жас аралығында.