Павлодар облысындағы қақтығыс: полиция қызметкері жұмысынан босатылды

Павлодарда жергілікті тұрғындармен сөзге келіп қалған полицей қызметінен босатылды, деп хабарлайды Tengrinews.kz.

Полиция мәліметінше, қазіргі уақытта қызметкер әрекетінің заңдылығы тексеріліп жатыр.

«Өзіндік қауіпсіздік басқармасының полиция қызметкерінің әрекетіне құқықтық баға беріледі. Тергеу кезінде полиция қызметкері жұмыстан босатылды», – дейді өңірлік ПД баспасөз қызметі.

Сондай-ақ, ведомство өкілдері қызметінен босатылған полицейдің Криминалдық полиция басқармасында жұмыс істегенін айтты.

Бұдан бөлек, полицейлер жергілікті тұрғындармен болған қақтығыста жедел әрекет ету жасағының қызметкерлері де болғанын растады.

«Камуфляж кигенлер  –  арнайы бөлімшенің қызметкерлері. Олардың әрекетіне де баға беріледі. Бүгінде бұл жағдайға Павлодар облысының прокуратурасы араласты, полицейдің әрекетінің заңдылығына қатысты толықтай зерттеу жүргізіліп, баға беріледі», – дейді полиция департаменті басшысының орынбасары Елдар Әбдікенов.

Оның айтуынша, бұл жағдайда полицейлер мен арнайы бөлімшенің қызметкерлері қақтығыстың алдын алуға тырысты.